Все акафисты прав. Иоанну Кронштадтскому

Сборник акафистов прведному Иоанну Кронштадтскому

Утвержденный Священным Синодом

Акафист святому праведному Иоанну, пресвитеру Кронштадтскому, чудотворцу

Текст утвержден Священным Синодом

Русской Православной Церкви

24 декабря 2008 года (журнал № 108)

Прав. Иоанн Кронштадтский

Читайте также: Святой праведный Иоанн Кронштадтский

Конда́к 1

Подо́бен: Взбра́нной Воево́де:

Избра́нный уго́дниче и пресла́вный чудотво́рче, о́тче пра́ведный Иоа́нне, гра́да Кроншта́дта пресла́вное украше́ние! Ты, от младе́нства Христу́ после́дуя, сораспя́тися Ему́ возжеле́л еси́ и, жизнь твою́ в Нем утверди́в, дар чуде́с от Бо́га прия́л еси́ и сло́вом живоно́сным всех напита́л еси́. Мы же, недосто́йнии, благода́рне вопие́м ти:

Ра́дуйся, Иоа́нне, земли́ Росси́йския моли́твенниче преди́вный.

И́кос 1

А́нгела све́тла, еще́ о́трок сый, я́ве узре́л еси́, о́тче Иоа́нне, и́же и рече́ ти, я́ко повеле́нием Госпо́дним приста́влен храни́ти тя во всех путе́х твои́х. Те́мже я́ко избра́нника Бо́жия ве́дуще тя, взыва́ем си́це:

Ра́дуйся, благода́ти Бо́жия сосу́де избра́нный;

ра́дуйся, сло́вом Бо́жиим измла́да наста́вленный.

Ра́дуйся, во о́трочестве явле́ния А́нгела Храни́теля сподо́бивыйся;

ра́дуйся, от ю́ности води́тельству Ду́ха Свята́го преда́выйся.

Ра́дуйся, роди́телей боголюби́вых благоче́стие восприе́мый;

ра́дуйся, целому́дрием и чистото́ю себе́ огради́вый.

Ра́дуйся, духо́вным наста́вником твои́м всем се́рдцем внима́вый;

ра́дуйся, почита́нием роди́телей благоволе́ние Бо́жие стяжа́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 2

Прови́дя, богоно́сне о́тче Иоа́нне, я́ко мно́гия беды́ и собла́зны гряду́т на Це́рковь Ру́сскую и ча́да Бо́жия гони́ма бу́дут, увеща́л еси́ лю́ди, глаго́ля: пока́йтеся, сто́йте в ве́ре Правосла́вней, крепи́теся и сла́вите Го́спода, взыва́юще Ему́: Аллилу́ия.

И́кос 2

Ра́зумом Боже́ственным наставля́емь, всеблаже́нне о́тче Иоа́нне, све́том и́стиннаго Богопозна́ния всех, приходя́щих к тебе́, просвеща́л еси́. Мы же, писа́ньми твои́ми науча́еми, вопие́м ти такова́я:

Ра́дуйся, ева́нгельския И́стины пла́менный служи́телю;

ра́дуйся, глаго́лов жи́зни ве́чныя немо́лчный возвести́телю.

Ра́дуйся, пра́ведным житие́м твои́м Бо́гу угоди́вый;

ра́дуйся, Це́рковь Бо́жию писа́нии твои́ми просла́вивый.

Ра́дуйся, Крест Христо́в пред очи́ма твои́ма вы́ну созерца́вый;

ра́дуйся, сораспя́тися Христу́ вседу́шне возжела́вый.

Ра́дуйся, Бо́га и бли́жних всем се́рдцем возлюби́вый;

ра́дуйся, лю́дем, в ско́рбех и печа́лех су́щим, утеше́ние подава́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 3

Си́лою Боже́ственныя благода́ти, я́ко свети́льник многосве́тлый Правосла́вныя Це́ркве, во гра́де Кроншта́дте просия́л еси́, пра́ведне Иоа́нне, и лю́ди, во тьме грехо́вней седя́щия и собла́зном богобо́рчества смуща́емыя, просвети́в, наставля́л еси́ пе́ти Бо́гу: Аллилу́ия.

И́кос 3

Име́я любо́вь па́стырскую, пра́ведне о́тче Иоа́нне, поте́кл еси́ к лю́дем, не иму́щим кро́ва и хле́ба насу́щнаго и во отча́янии погиба́ющим, и сих любо́вию и милосе́рдием Христу́ приобре́л еси́. Мы же благода́рне взыва́ем ти си́це:

Ра́дуйся, в хра́ме Бо́жии дерзнове́нный о лю́дех моли́твенниче;

ра́дуйся, си́рым и вдови́цам ми́лостивый помо́щниче.

Ра́дуйся, окамене́нныя се́рдцем к покая́нию побужда́яй;

ра́дуйся, неве́дущия Бо́га Боже́ственною прему́дростию просвеща́яй.

Ра́дуйся, стропо́тных и злонра́вных ти́хое исправле́ние;

ра́дуйся, лени́вых и малове́рных ре́вностное обличе́ние.

Ра́дуйся, Ца́рствия Бо́жия и пра́вды его́ пропове́дниче неустраши́мый;

ра́дуйся, проти́ву ко́зней духо́в зло́бы поднебе́сных вои́телю неуста́нный.

Ра́дуйся, Иоа́нне, земли́ Росси́йския моли́твенниче преди́вный.

Конда́к 4

Бу́рю злоче́стия, воздвиза́ему на Це́рковь на́шу святу́ю, прови́дя, о́тче Иоа́нне, я́ко ве́рный страж до́му Госпо́дня, поуча́л еси́ ча́да Бо́жия бде́ти, во и́стинней ве́ре пра́во ходи́ти и в за́поведех Госпо́дних непоро́чно пребыва́ти, да спасе́т Госпо́дь лю́ди Своя́, в покая́нии Ему́ зову́щия: Аллилу́ия.

И́кос 4

Слы́шаще лю́дие Бо́жии, я́ко ты еси́, о́тче Иоа́нне, сосу́д избра́нный и благода́тных даро́в преиспо́лненный, не то́кмо от Кроншта́дта, но и от всех конце́в земли́ к тебе́ притека́ху, я́ко да исцеле́ния и по́мощь улуча́т. С ни́ми же и мы, я́ко хода́таю пред Бо́гом те́плу, уми́льно зове́м ти:

Ра́дуйся, се́ятелю пра́вды, а́лчущия жи́зни ве́чныя напита́вый;

ра́дуйся, обличи́телю непра́вды, ве́рныя от пре́лести грехо́вныя огражда́вый.

Ра́дуйся, заблу́ждшим и неразу́мным путь к Бо́гу указу́яй;

ра́дуйся, писа́ньми твои́ми ча́да Бо́жия наставля́яй.

Ра́дуйся, скорбя́щих и обремене́нных при́сное упова́ние;

ра́дуйся, боля́щих и стра́ждущих благода́тное врачева́ние.

Ра́дуйся, сосу́де избра́нный, да́ры Ду́ха Свята́го ди́вно укра́шенный;

ра́дуйся, свети́льниче всесве́тлый, на све́щнице церко́внем Бо́гом поста́вленный.

Ра́дуйся, Иоа́нне, земли́ Росси́йския моли́твенниче преди́вный.

Конда́к 5

Я́ко звезда́ многосве́тлая, священноле́пным житие́м твои́м просия́л еси́, па́стырю Христо́в Иоа́нне! Ты бо ста́до, Бо́гом вруче́нное тебе́, от волко́в, губя́щих е́, огражда́л еси́, взыва́я: пока́йтеся и жи́ви бу́дете, отыми́те лука́вство от душ ва́ших, да чи́стым се́рдцем Бо́га у́зрите и воспое́те Ему́: Аллилу́ия.

И́кос 5

Ве́дая мно́жество люде́й, утеше́ния ча́ющих, я́ко апо́стол Христо́в, обходи́л еси́ гра́ды и ве́си Росси́йския, чудотво́рче изя́щне, се́я сло́во Бо́жие, исцеля́я неду́жныя и малове́рныя исправля́я, быв всем вся, да вся́ко не́кия спасе́ши. Мы же боле́зни и труды́ твоя́ почита́юще, вопие́м ти си́це:

Ра́дуйся, я́ко си́лою благода́ти немощны́я укрепля́л еси́;

ра́дуйся, я́ко моли́твами твои́ми гре́шныя к покая́нию приводи́л еси́.

Ра́дуйся, а́лчущия и жа́ждущия по за́поведи Госпо́дни насыща́вый;

ра́дуйся, благове́стием Христо́вым лю́ди к пра́вде Бо́жией приводи́вый.

Ра́дуйся, моли́твами твои́ми малове́рныя в ве́ре укрепля́вый;

ра́дуйся, си́лою Бо́жиею немощны́м здра́вие подава́вый.

Ра́дуйся, зе́млю на́шу благогове́йно с про́поведию обходи́вый;

ра́дуйся, мир сей, я́ко прему́дрое творе́ние Бо́жие, воспева́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 6

Пропове́дницы чу́дных дея́ний твои́х, блаже́нне Иоа́нне, яви́шася мно́зи: бога́тии и ни́щии, ста́рцы и ю́ноши, ты бо всем любо́вь твою́ излива́л еси́ бога́тно. Те́мже не то́кмо правосла́внии, но и инове́рнии си́лою моли́тв твои́х ми́лость Бо́жию обрета́ху, пою́ще Бо́гу: Аллилу́ия.

И́кос 6

Возсия́л еси́ житие́м твои́м в Це́ркви Правосла́вней па́че сия́ния се́вернаго, блаже́нне Иоа́нне, путь пра́вый лю́дем указу́я. Те́мже моли́ Го́спода Сил, да любо́вь свята́я утверди́тся в сердца́х на́ших, да ни скорбь, ни теснота́, ни смерть, ни бла́га ми́ра сего́ возмо́гут разлучи́ти нас от любве́ Бо́жия, благода́рне тебе́ вопию́щих:

Ра́дуйся, ве́ру Правосла́вную в чистоте́ храни́ти завеща́вый;

ра́дуйся, те́сным путе́м за́поведей Христо́вых ходи́ти поуча́вый.

Ра́дуйся, в ско́рбех и печа́лех су́щим ра́дость подава́вый;

ра́дуйся, к и́стинному покая́нию гре́шники призыва́вый.

Ра́дуйся, Бо́жиим смотре́нием гряду́щая нам возвеща́вый;

ра́дуйся, от сете́й вра́жиих оте́чество на́ше огражда́вый.

Ра́дуйся, мир с Бо́гом свя́то храни́ти запове́давый;

ра́дуйся, сло́вом и́стины и любо́вию ве́рным лю́дем послужи́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 7

Хотя́ Всеблаги́й Госпо́дь спасти́ лю́ди земли́ на́шея и угото́вати я́ к же́ртвенному служе́нию, испо́лни тя, всеблаже́нне Иоа́нне, ду́ха проро́чества, прему́дрости и ра́зума, я́ко да, сло́вом твои́м наста́влени, во дни гряду́щих испыта́ний непоколеби́мо вопию́т Бо́гу: Аллилу́ия.

И́кос 7

Но́ваго избра́нника Бо́жия, всеблаже́нне Иоа́нне, ве́дуще тя боголюби́вии лю́дие, на всяк день Же́ртву безкро́вную принося́ща и со дерзнове́нием за всех Христу́ моля́щася, с ве́рою к тебе́ притека́ху и исцеля́хуся. Те́мже и мы, испо́лненнии твои́х благодея́ний, с любо́вию воспева́ем ти сицева́я:

Ра́дуйся, у Престо́ла Бо́жия приле́жный о нас моли́твенниче;

ра́дуйся, и́стиннаго покая́ния усе́рдный пропове́дниче.

Ра́дуйся, я́ко неле́ностно рабо́тати Христу́ Бо́гу нас наставля́еши;

ра́дуйся, я́ко стоя́ти на боже́ственней стра́жи нас призыва́еши.

Ра́дуйся, о́браз воздержа́ния и целому́дрия ве́рным яви́вый;

ра́дуйся, па́ству твою́ от ересе́й и раско́ла му́дре защити́вый.

Ра́дуйся, су́щих во тьме неве́дения ре́вностный просвети́телю;

ра́дуйся, душ челове́ческих от суеты́ жите́йския ди́вный огради́телю.

Ра́дуйся, Иоа́нне, земли́ Росси́йския моли́твенниче преди́вный.

Конда́к 8

Стра́нное чу́до ви́дим, явле́нное тебе́, преди́вный па́стырю Христо́в Иоа́нне! Тя бо и лю́ди ве́рныя Сама́ Пречи́стая Ма́ти Бо́жия я́ко миле́йшая ча́да Отца́ Небе́снаго нарече́. Сего́ ра́ди мы, си́ми словесы́ утеша́еми, вопие́м Царю́ веко́в: Аллилу́ия.

И́кос 8

Весь жела́нием Боже́ственным распаля́емь, любве́ Христо́вы преиспо́лнился еси́, па́стырю до́брый! Мы же, неради́вии, сокро́вищ ея́ не стяжа́вше, мно́гих скорбе́й и печа́лей досто́йни яви́хомся. Оба́че, ве́дуще тя помо́щника неусы́пна, со упова́нием взыва́ем ти си́це:

Ра́дуйся, любве́ Христо́вы сосу́де избра́нный;

ра́дуйся, явле́ния Бо́жия Ма́тере удосто́енный.

Ра́дуйся, Це́ркве Христо́вы неугаса́ющий свети́льниче;

ра́дуйся, о всем ми́ре хода́таю и печа́льниче.

Ра́дуйся, ми́ра и пра́вды Бо́жия ревни́телю;

ра́дуйся, благоче́стия и добронра́вия насади́телю.

Ра́дуйся, Росси́йския Це́ркве похвало́ и украше́ние;

ра́дуйся, земли́ на́шея благода́тное утвержде́ние.

Ра́дуйся, Иоа́нне, земли́ Росси́йския моли́твенниче преди́вный.

Конда́к 9

Всем лю́дем, в неве́дении, ско́рбех и печа́лех су́щим, воздви́же тя Госпо́дь па́стыря и чудотво́рца преди́вна, о́тче Иоа́нне, е́же гре́шныя на путь пра́вый наста́вити, неве́рныя к Бо́гу обрати́ти и боля́щия исцели́ти, да согла́сно воспою́т вси спаси́тельную песнь: Аллилу́ия.

И́кос 9

Вети́и многовеща́нии безгла́сни бы́ша о благода́ти, да́нней тебе́, Иоа́нне преди́вне, егда́ сло́вом еди́нем лю́ди от греха́ к покая́нию приводи́л еси́, неду́жныя от одра́ боле́зни воздвиза́л еси́, бе́сы изгоня́л еси́. Мы же я́ко чудотво́рца и уго́дника Бо́жия прославля́ем тя си́це:

Ра́дуйся, страстьми́ одержи́мых ди́вный врачева́телю;

ра́дуйся, в долгонеду́жии су́щих безме́здный цели́телю.

Ра́дуйся, отпа́дшия к Бо́гу приводи́вый;

ра́дуйся, безбо́жныя гро́зно облича́вый.

Ра́дуйся, ка́ющихся кро́ткий наказа́телю;

ра́дуйся, ми́лостыни ще́дрый пода́телю.

Ра́дуйся, христиа́нскаго просвеще́ния и благоче́стия ре́вностный насади́телю;

ра́дуйся, ю́ных по стезя́м пра́вды му́дрый путеводи́телю.

Ра́дуйся, Иоа́нне, земли́ Росси́йския моли́твенниче преди́вный.

Конда́к 10

Спасти́ хотя́ лю́ди Росси́йския, ересьми́ и неве́рием соблазня́емыя, о́тче Иоа́нне, ко́зни бесо́вския обличи́л еси́ и правосла́вное испове́дание ве́ры тве́рдо яви́л еси́. Сего́ ра́ди Ца́рствия Небе́снаго дости́гл еси́, иде́же со А́нгелы и ли́ки святы́х непреста́нно о нас мо́лиши Бо́га и пое́ши Ему́: Аллилу́ия.

И́кос 10

Стена́ тве́рда яви́лся еси́ лю́дем стра́ждущим, от всех конце́в земли́ Росси́йския к тебе́ приходя́щим, богоно́сне о́тче Иоа́нне. Те́мже и нас, бе́дствующих и немощству́ющих душе́ю и те́лом, укрепи́ моли́твами твои́ми, и́миже огражда́еми, прино́сим ти похвалы́ сия́:

Ра́дуйся, свети́льниче неугаси́мый, огне́м Ду́ха Свята́го возжже́нный;

ра́дуйся, кри́не благоуха́яй, росо́ю благода́ти Бо́жия напое́нный.

Ра́дуйся, лозо́ многопло́дная, благода́тными да́ры ве́рных пита́ющая;

ра́дуйся со́ле земли́, от грехо́внаго тле́ния нас сохраня́ющая.

Ра́дуйся, в мо́ри жите́йстем обурева́емым ти́хое приста́нище;

ра́дуйся, душе́вне и теле́сне изнемога́ющим благо́е вспоможе́ние.

Ра́дуйся, сердцеве́дче прему́дрый, ве́рныя лю́ди от мудрова́ния ми́ра сего́ огражда́яй;

ра́дуйся, се́ятелю Христо́в, се́янием ева́нгельским сердца́ мно́гих увеселя́яй.

Ра́дуйся, Иоа́нне, земли́ Росси́йския моли́твенниче преди́вный.

Конда́к 11

Песнь достохва́льную прино́сим ти, о́тче Иоа́нне, всем житие́м твои́м Бо́га просла́вльшему. И я́коже на земли́ за всех и за вся Влады́ку ми́ра умоля́л еси́, си́це и ны́не на Небеси́ вознеси́ моли́твы твоя́, да во оте́чествии на́шем при́сно воспева́ется Бо́гу побе́дная песнь: Аллилу́ия.

И́кос 11

Светоза́рную свещу́ ве́мы тя, Бо́гом избра́нне о́тче Иоа́нне, ты бо и по отше́ствии от земны́х к Небе́сным у Престо́ла Бо́жия в со́нме святы́х и Сил а́нгельских о нас при́сно хода́тайствуеши. Сего́ ра́ди благода́рственно взыва́ем ти си́це:

Ра́дуйся, я́ко в по́двизе твое́м И́мя Пресвяты́я Тро́ицы ди́вно просла́вися;

ра́дуйся, я́ко благоче́стием и ве́рою твое́ю Це́рковь Христо́ва украси́ся.

Ра́дуйся, па́стырей богому́дрый наста́вниче;

ра́дуйся, и́нокинь до́брый учи́телю.

Ра́дуйся, супру́ги соу́з бра́чный свя́то храни́ти поуча́вый;

ра́дуйся, ча́да почита́ти роди́тели своя́ увещава́вый.

Ра́дуйся, я́ко сострада́нием твои́м к бли́жним ско́рби и печа́ли утоля́ются;

ра́дуйся, я́ко моли́твами твои́ми гре́шницы на путь спасе́ния обраща́ются.

Ра́дуйся, Иоа́нне, земли́ Росси́йския моли́твенниче преди́вный.

Конда́к 12

Благода́тных даро́в Ду́ха Свята́го испо́лни тя Госпо́дь, о́тче наш Иоа́нне, и́миже ре́вностно послужи́л еси́ наро́ду Бо́жию. Вознеси́ моли́тву к Бо́гу и о нас, да ве́ры, наде́жды и любве́ дости́гше, прича́стницы жи́зни во Христе́ бу́дем и сподо́бимся воспева́ти благода́рственную песнь: Аллилу́ия.

И́кос 12

Пою́ще твое́ достохва́льное житие́ на земли́ и сла́ву, ю́же стяжа́л еси́ на Небеси́, о́тче Иоа́нне, притека́ем во оби́тель тобо́ю созда́нную и припа́даем к гробни́це твое́й, от нея́же исцеле́ния и по́мощь улуча́юще, возглаша́ем ти сицева́я:

Ра́дуйся, пропове́дниче изря́дный, проро́ком и апо́столом до́бре поревнова́вый;

ра́дуйся, па́стырю земли́ Росси́йския, Бо́гом избра́нный и просла́вленный.

Ра́дуйся, оби́тель преподо́бнаго покрови́теля твоего́ Иоа́нна Ры́льскаго ди́вно устро́ивый;

ра́дуйся, оби́телию се́ю град свята́го Петра́ сла́вно украси́вый.

Ра́дуйся, в возсозда́нную оби́тель и́нокини собира́яй;

Ра́дуйся, я́ко оте́ц чадолюби́вый, при́сное попече́ние о них име́яй.

Ра́дуйся, всем притека́ющим к тебе́ ско́рое вспоможе́ние подава́яй;

ра́дуйся, о́браз до́браго па́стыря сло́вом, житие́м и ве́рою нам яви́вый.

Ра́дуйся, Иоа́нне, земли́ Росси́йския моли́твенниче преди́вный.

Конда́к 13

О святы́й пра́ведный о́тче Иоа́нне, всеросси́йский свети́льниче и преди́вный чудотво́рче! Приими́ хвале́бное сие́ пе́ние на́ше и умоли́ Христа́ Бо́га Це́рковь Святу́ю в благоче́стии утверди́ти, еди́нство в сою́зе ми́ра и любве́ Христо́вы соблюсти́, да и мы воспое́м с тобо́ю Бо́гу: Аллилу́ия.

Сей конда́к глаго́лется три́жды.

И па́ки чте́тся 1-й и́кос и 1-й конда́к.

Моли́тва

О вели́кий чудотво́рче и преди́вный уго́дниче Бо́жий, богоно́сне о́тче Иоа́нне! При́зри на нас и внемли́ благосе́рдно моле́нию на́шему, я́ко вели́ких дарова́ний сподо́би тя Госпо́дь, да хода́тай и при́сный моли́твенник за нас бу́деши. Се бо, страстьми́ грехо́вными обурева́еми и зло́бою снеда́еми, за́поведи Бо́жия пренебрего́хом, покая́ния серде́чнаго и слез воздыха́ния не принесо́хом, сего́ ра́ди мно́гим ско́рбем и печа́лем досто́йни яви́хомся. Ты же, о́тче пра́ведне, ве́лие дерзнове́ние ко Го́споду и сострада́ние к бли́жним свои́м име́я, умоли́ Всеще́драго Влады́ку ми́ра, да проба́вит ми́лость Свою́ на нас и потерпи́т непра́вдам на́шим, не погуби́т нас грех ра́ди на́ших, но вре́мя на покая́ние ми́лостивно нам да́рует. О свя́тче Бо́жий, помози́ нам ве́ру правосла́вную непоро́чно соблюсти́ и за́поведи Бо́жия благоче́стно сохрани́ти, да не облада́ет на́ми вся́кое беззако́ние, ниже́ посрами́тся пра́вда Бо́жия в непра́вдах на́ших, но да сподо́бимся дости́гнути кончи́ны христиа́нския, безболе́зненныя, непосты́дныя, ми́рныя и Та́ин Бо́жиих прича́стныя. Еще́ мо́лим тя, о́тче пра́ведне, о е́же Це́ркви на́шей Святе́й до сконча́ния ве́ка утвержде́нней бы́ти, Оте́честву же на́шему мир и пребыва́ние в пра́вде Бо́жией испроси́ и от всех зол сохрани́, да та́ко наро́ди на́ши, Бо́гом храни́ми, в единомы́слии ве́ры и во вся́ком благоче́стии и чистоте́, в ле́поте духо́внаго бра́тства, трезве́нии и согла́сии свиде́тельствуют: я́ко с на́ми Бог! В Не́мже живе́м, и дви́жемся, и есмы́, и пребу́дем во ве́ки. Ами́нь.

И́на моли́тва

О святы́й пра́ведный о́тче Иоа́нне, всеросси́йский свети́льниче и преди́вный чудотво́рче! Ты от младе́нческих лет Бо́гом избра́н был еси́ и, ду́хом пламене́я, я́ко и́стинный па́стырь, житие́м, сло́вом, любо́вию, ве́рою, чистото́ю лю́дем послужи́л еси́. Сего́ ра́ди мо́лим тя, пра́ведный о́тче: моли́ Человеколю́бца Бо́га Це́рковь Святу́ю ми́ром и тишино́ю огради́ти, зе́млю Росси́йскую во благоде́нствии сохрани́ти, па́стыри благода́ти и и́стины преизоби́льно испо́лнити, вла́сти умудри́ти, правосла́вное во́инство укрепи́ти, немощны́я исцели́ти, развраще́нныя испра́вити, ю́ныя воспита́ти, ста́рцы и вдови́цы уте́шити и нам всем во Ца́рствии Небе́снем сподо́битися со все́ми святы́ми прославля́ти Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Для келейного чтения, составленный иеросхим. Пахомием

Акафист честному и славному иерею Божию Иоанну Кронштадтскому

Составитель – иеросхимонах Пахомий, келейной обители Вознесения Господня на Афоне.

1 марта 1932 года.

Кондак 1

Избранному во иереях, дивному угоднику Божию Иоанну, пастырю и учителю, Царей любителю, скорбных утешителю, земли Российский светлому светильнику, все житие свое на служение Богу и ближним посвятившему, и множество грешников на покаяние обратившему: многим же болящим исцеление у Бога испросившему, составим похвалу, яко ходатаю нашему и скорому помощнику.

Ты же, отче, яко имеяй дерзновение ко Господу, от всяких нас бед свобождай, да зовем ти хвалебно:

Радуйся, Иоанне, новый Российский светильниче, а теплый о нас к Богу молитвенниче.

Икос 1

Ангела хранителя своего, еще шестолетен сый, в светлости неизреченней яве узрел еси, Иоанне, иже и рече тебе, яко по повелению Господню всегда невидимо соприсутствует и хранит тя от всех зол. Темже от юности избранника Божия тя ведуще, взываем сице:

Радуйся, от младенства по предуведению Богом избранный: радуйся, от юности в служении Ему Того благодатию призванный.

Радуйся, ангела хранителя твоего из детства добрыми нравы веселивый: радуйся, николиже того чем опечаливый.

Радуйся, яко незримый хранитель твой яве тебе явися: радуйся, яко той всегда хранити тя обещася

Радуйся, благочестивых родителей чадо возлюбленное: радуйся, теми из детства в страсе Божием воспитанный.

Радуйся, воздержанию от юности себе обучивый: радуйся, во убожестве и нищете младые дни своя препроводи вый.

Радуйся, яко благонравия твоего ради благодать Божия яве на тебе почиваше: радуйся, яко та лице твое всегда благоумиленно творяше.

Радуйся, Иоанне, новый Российский светильниче, и теплый о нас к Богу молитвенниче.

Кондак 2

Видим тя, богомудре Иоанне, от юна возраста благодатию Божиею осененна бывша, и ею таинственно на добродетельное житие наставляема и руководима. Темже, имуще тя себе во образ и подражание, умильно вопием Христу Богу: Аллилуиа.

Икос 2

Разум твой из млада в чтение и разумение священнаго и святоотеческаго Писания углубил еси, Иоанне, и из него, яко губка, воспринимал еси воду живу, от источника Святаго Духа проистекающую. Темже молим тя: умоли благаго Господа, да сподобит причастниками бытн сея живительный струи и нас взывающих ти сице:

Радуйся, от младенства чиста себе от страстей соблюдши: радуйся, благодать святаго крещения целу и невредиму сохранивый.

Радуйся, чтение Божественных писаний усердно возлюбивый: радуйся, сокровенный в них смысл право и добре уразумевый.

Радуйся, во учении книжнем прилежание примерное показавый: радуйся, в любомудрии естественном и духовнем славно преуспевый.

Радуйся, любомудрием твоим мира прелести скоро распознавый: радуйся, тех сетей, яко орел высокопарный, мудре избежавши.

Радуйся, северныя Российския страны чудное и светлое воспитание: радуйся, мрака греховнаго в людех разгнание.

Радуйся, всем притекающим к тебе скорое вспоможение подавали: радуйся, многомощное нам пред Богом заступление являяй.

Радуйся, Иоанне, новый Российский светильнике, и теплый о вас к Богу молитвенниче.

Кондак 3.

Сила благодати Божия, недостающая восполняющая, обильно излияся на тя, Иоанне приснопамятне, егда от святителя Христофора во иереа рукоположен был еси, и граду Кронштадту пастырь учинен: оттоле бо начал еси учити люди верно служити Святей Троице и пети Ей: Аллилуиа.

Икос 3

Имея любовь Божественную в сердце своем, мудре Иоанне, и устав поста строго соблюдая, удобь поборал еси страстей двизания николиже теми запявся. Темже, яко муж силен, изшел еси на делание нивы Господни: словом, яко ралом, разрыхляя отвердевшая и оледеневшая сердца человеческая, согревая же та молитвою и теплотою любве твоея, и насевая в них семена искренняго покаяния и живыя веры. Сего ради восписуем ти таковыя похвалы:

Радуйся, избранный сосуде Божия благодати: радуйся, даров небесных вместилище.

Радуйся, всем сердцем и всем помышлением твоим Бога возлюбивый: радуйся, сего ради и чада твоя духовная искренне того любити учивый.

Радуйся, заповеди Божия и уставы Церкве о постех опасно хранивый: радуйся, таковым хранением любовь твою к Богу и ближним делы проявивый.

Радуйся, от юности над страстьми воцаривыйся: радуйся, славен победитель над теми явивыйся.

Радуйся, в мире поживый премирно: радуйся, на земля мудрствовавый небесно.

Радуйся, царства православно-российскаго столпе неподвижимый: радуйся, православия и добрых обычаев блюстителю непозыблемый.

Радуйся, Иоанне, новый Российский светильниче, и теплый о нас к Богу молитвенниче.

Кондак 4

Бурею многих бед и волнений житейских одержимым нам, помогай, отче Иоанне, якоже и в животе твоем помогал еси всем, с верою к тебе притекавшим да вси тобою вспомоществуеми, благодарно о тебе поем Богу: Аллилуиа.

Икос 4

Слышав апостола глаголюща: «наше житие на небесех есть» и хотя е наследовати, маловременное сие житие не во угождении плоти и работе страстей иждил еси, Иоанне, но во очищении души от скверн греховных (с ними же никтоже может внити в Царствие Небесное). Темже имуще тя во образ богоугоднаго жития и помощника в сем, взываем сице:

Радуйся, света евангельскаго (в наши дни) светлое блистание: радуйся, омраченных душ вседейственное просвещение.

Радуйся, яко в Божественная писания весь ум твой углубил еси: радуйся, яко в них стезю правую в царствие небесное обрел еси.

Радуйся, яко вся деяния твоя свет миру быта: радуйся, яко тобою Отец небесный дивно прославися.

Радуйся, яко слово твое не бе якоже кимвал бряцаяй, мертво, нечувственно: радуйся, яко тое бяше воистину живо и действенно.

Радуйся, яко тобою мертвии духом верою оживляются: радуйся, яко тобою падший в бездну греховную к покаянию возбуждаются.

Радуйся, яко тебе во дни наши яви Господь земли Российстей яко пророка и апостола: радуйся, яко в тебе врази истины обретоша неустрашимаго обличителя и крепкаго противоборца.

Радуйся, Иоанне, новый Российский светильниче, и теплый о нас к Богу молитвенниче.

Кондак 5

Звезда многосветлая земли Российский явился еси священне Иоанне, мрак греховный просвещающая. Темже и ныне подаждь просвещение сыном Российским, тмою заблуждения объятым и во власть нечестивых предавшихся, да познают свое окаянство, и обратившеся ко Господу, в покаянии возопиют Ему: Аллилуиа.

Икос 5

Видевше Российстии народи великаго тя благочестия проповедника, и многомощна пред Богом молитвенника и предстателя, во множестве отовсюду к тебе притекаху, инии же писания своя тебе, отче, посылаху, исцеления в болезнех, совета в недоумениях я утешения в скорбех просяще: и улучивше желание, благодарственно тебе взываху:

Радуйся, Иоанне, новый миру светильниче: радуйся, непосредственный в молитвах Богу собеседниче.

Радуйся, яко твоя молитвы сильны и многомощны Владыку умилостивляти: радуйся, яко твое к Нему предстательство многодейственно, благость Его на щедродательство подвизати.

Радуйся, яко тобою, по море веры, подаются благодатная исцеления: радуйся, яко тобою недугующи приемлют скорое недугов своих в здравии пременение.

Радуйся, яко тобою грешнии па покаяние обращаются; радуйся, яко тобою безчиннии крамольцы вразумляются.

Радуйся, яко тобою безумнии глумителие над тайнами веры посрамляются: радуйся, яко тобою посмеятели о чудесных твоих деяний подобающее вразумление приемлют.

Радуйся, скорбящих благодатный утешителю: радуйся в недоумении сущих благостный вразумителю.

Радуйся, Иоанне, новый Российский светильниче, и теплый о нас к Богу молитвенниче.

Кондак 6

Проповедником истины, Богоносным отцем подражая, всего себе на служение Богу и ближним Вдал еси, и сан священства нося, покоя не познал еси, службы Божия в храме присно совершая, и в домех верных молебныя пения воспевая, нуждающимся же щедро благотворя, наименование благотворца и безсребренника стяжал еси, Иоанне. Темже и по успении твоем, Российстии людие прославляют имя твое, и вечную память тебе возглашающе, поют Богу: Аллилуиа.

Икос 6

Возсиявый от Девы Христос Бог наш, и тму идолобесия светом евангелия разгнавый, яви тя, отче Иоанне, верна и ревностна проповедника Своея истины, клевретами лукаваго извращаемыя. Темже, яко имени дерзновение ко Господу, избави от тех злобы и коварства всех воспевающих ти таковая:

Радуйся, служителю Христов изрядный: радуйся, во иереех угодниче Того преизящный.

Радуйся, на стражи дома Божия недремленно стоявый: радуйся, татей духовных мечем слова Божия и молитвою отгонявый.

Радуйся, писаньми твоими многих от любве мирския к любви Христове подвигнувый: радуйся, вещаньми твоими любовь Божию к человеком, во искуплении и промышлении нам явленную изъявивый.

Радуйся, действие Духа Божия на сердца человеческая удобопостижно сказавый: радуйся, тайну молитвеннаго с Богом собеседования яве указавый.

Радуйся, целомудрие в законном супружестве твоем чудесно сохранивый: радуйся, многая чада духовная покаянием породивый.

Радуйся, в сердцах верных благую память по себе оставивый; радуйся, яко память сия, яко праведника, незабвенна пребудет во веки.

Радуйся, Иоанне, новый Российский светильниче, и теплый о нас к Богу молитвенниче.

Кондак 7

Хотя Всеблагий Господь утешити верныя люди своя, и отвратити беззаконныя от злых дел их, воздвиже тя Иоанне, якоже пророка Иону Ниневии граду великому: да проповеси Россияном гнев Божий, грядущий на ня вскоре, еже и собыстся уже по твоему вещанию: ибо непокаяни в гордыни пребыхом, и не восхотехом с тобою смиренно пети Христу Богу: Аллилуиа.

Икос 7

Нова беда и гнев Божий постиже нас, не восхотевших внимати богодухновенным твоим глаголом: держава бо царства нашего разрушися, и слугам сатаны во власти предадеся, иже честныя обители иноческия разориша, святые храмы оскверниша, и вся благочестивый люди люте озлобиша, и множество духовнаго и мирского чина мученической смерти предаша. Темже к тебе, отче Иоанне, в покаянии прибегаем и умильно взываем: умоли Владыку Христа, да преложит гнев Свой на милость, и да услышит нас, взывающих ти сице:

Радуйся, покаяния велегласный проповедниче: радуйся, грядущаго гнева Божия на люди согрешивший неложный провозвестниче.

Радуйся, нечестия людского громогласный обличителю: радуйся, о исправлении тех ревностный рачителю.

Радуйся, Царства Православно-Российскаго при животе твоем крепкий оплот бывый: радуйся, от крамол во дни оны тое сохранивый.

Радуйся, Царей благочестивых присный любимиче: радуйся, мудрый тех советниче и наставниче.

Радуйся, о власти Царствей, яко богоуставленней, многая словеса провещавый радуйся, к послушанию и верности законной той власти люди тщаливо приводяй.

Радуйся, молитвами твоими престолы Царей благочестивых ограждаяй: радуйся, суды правы в людех творити тех поучаяй.

Радуйся, Иоанне, новый Российский светильниче, и теплый о нас к Богу молитвенниче.

Кондак 8

Странный и необычный путь жития совершил еси, отче Иоанне: в мире бо пожив премирно и на земли небесно: в воздержании и целомудрии, и во всегдашнем Бога славословии великим Отцем подражал еси. С ними же ныне на небеси Христу в веселии предстоя, и молитвы о мире принося, выну поеши: Аллилуиа.

Икос 8

Все православнии людие, якоже в животе, тако и по преставлении твоем к Богу, вельми чтут тя, отче Иоанне, верующе, яко велие дерзновение к Богу имаши, и молиши благость Его о всех к тебе притекающих, и тако взывающих:

Радуйся, благаго корене доброе прозябение: радуйся, отца клирика и матере благочестивый рождение и воспитание.

Радуйся, яко малая весь Сура, твоего ради в ней рождения и воспитания всей земли Российстей ведома сотворися: радуйся, яко град Кронштадт твоим в нем служением прославися.

Радуйся, яко милосердыми делы твоими вся земля Российская наполнися: радуйся, яко весть о чудней и святем житии твоем и за пределы ея распространися.

Радуйся, яко писаньми твоими тайна благодатнаго с Богом общения изъясняется: радуйся, яко сими писаньми свет духовнаго озарения в сердца чтущих я изливается.

Радуйся, яко в писаниих твоих чистота души твоея яве прозревается: радуйся, яко в них, якоже в зерцале, богоподобие души человеческия отображается.

Радуйся, яко писаниями твоими не токмо Россиане, но инороднии народы во спасение свое назидаются: радуйся, яко ими истинная вера возсиявает и мраки ересей разгоняются.

Радуйся, Иоанне, новый Российский светильниче, и теплый о нас к Богу молитвенниче.

Кондак 9

Всякое слово не довлеет к похвале твоей, отче Иоанне, ты бо Духом Святым движим от юности Богу усердно послужил еси: первее в изучении священных писаний многа лета усердно труждаяся и разум глубок стяжевая, таже о научении отроков и о пастве твоей прилежно пекийся, всех поучал еси разумно пети Богу: Аллилуиа

Икос 9

Вития суемудрый, Лев безумный и единомысленицы его, тобою, отче Иоанне, яве посрамишася в злочестии своем, православнии же в вере утвердишася, боговещанными твоими глаголы наставляеми, Темже, восхваляюще тя, взываем сице:

Радуйся, цевнице боговещанная: радуйся, гусль Духа сладкозвучная.

Радуйся, словесы и писаньми твоими догматы веры уяснивый: радуйся, вещаньми твоими верных смыслы в православии утвердивый.

Радуйся, яко тобою полки богоборцев победишася: радуйся, яко тобою яснополянский богоотступник и клевреты его мудро изобличишася.

Радуйся, яко тобою душепагубное того учение о душе человечестей, аки бы не имеющей личнаго бытия, низложися: радуйся, яко тобою истинное учение о безсмертии и лично безконечном пребывании ея утвердися.

Радуйся, разума Божественнаго мудрый изъявителю; радуйся таинств церковных благоговейный совершителю.

Радуйся, благонадежный в Царствие Небесное руководителю: радуйся, пути спасительнаго истинный учителю.

Радуйся, Иоанне, новый Российский светильниче, и теплый о нас к Богу молитвенниче.

Кондак 10

Спасти хотя душу твою, многих святых добродетели в себе совокупил еси, отче Иоанне: апостольское и святоотеческое веры исповедание, мученическую в благочестии твердость, всегдашнее в молитвах бодрствование, воздержании и смирение, в купе же и подвиги преподобных. Темже ныне, со святыми на небеси водворялся, и непрестанно Бога славословя, поминай нас, славную память твою почитающих и поющих Богу: Аллилуиа.

Икос 10

Царя небеснаго усердный священнослужителю, и земных благочестивых царей верный чтителю и любителю, отче Иоанне: обоим праведно благоугодивый, воздая Кесарево Кесареви и Божия Богови, и вся люди тому же поучал еси. Сего ради восхваляем тя и глаголем сице:

Радуйся, рабе Божий, благий и верный: радуйся, служителю Того усердный.

Радуйся, вся поведенная от Господа тщаливо творивый: радуйся, заповедей Его искусный делатель бывый.

Радуйся, о вездесущии Божии всегда помышлявый: радуйся, умным очесем твоим Того выну представлявый.

Радуйся, благочестивых Царей Российских яко слуг Божиих почитавый: радуйся, благими советы и молитвами твоими в трудном их подвиге народоправления помогавый.

Радуйся, к попечению о благе Церкве и народа своего Тех подвизавый: радуйся, от крамол и мятежей в животе твоем Тех защищавый.

Радуйся, и ныне о Царстве Православно-Российском Бога умоляяй: радуйся скиптры царей православных утверждаяй.

Радуйся, Иоанне, новый Российский светильниче, и теплый о нас к Богу молитвенниче.

Кондак 11

Песней похвалою невозможно есть изобразати множество о Бозе исправлений твоих, о пречудне отче Иоанне: я же совершил еси во всем житии твоем: немощныя молитвами твоими исцеляя, бесы от человек изгоняя, пиянством и иными страстьми недуговавшия врачуя, в нищете же и убожестве сущия обильно ущедряя: и всем по коегождо потребе помогая и благотворя, яко всем благодарно о тебе пети Богу: Аллилуиа.

Икос 11

Светильника светла и прозорливца дивна яви тя Господь во днех наших, провозвестивша грядущий гнев Его на Царство православно-Российское, зане непокаяхомся проповедию твоею. Темже, яко пророка Божия и провозвестника Того судеб, ублажаем тя и в покаянии взываем:

Радуйся, провидче дивный; радуйся, будущих событий предсказателю неложный

Радуйся, древним покаяния проповедником равный: радуйся, новым провидцем равночестный.

Радуйся, сокровенных судеб Божиих яснозрителю: радуйся, грядущаго гнева Божия на нераскаянныя грешники возвестителю.

Радуйся, покаяния сладкогласный глашателю: радуйся, смятенных сердец умирителю.

Радуйся, многомощный наш пред Богом ходатаю: радуйся: благонадежный наш пред Ним предстателю.

Радуйся, добрый словесных овец пастырю, множество заблудших душ взыскавый: радуйся, от уз темничных и смерти многих свободивый.

Радуйся, Иоанне, новый Российский светильниче, и теплый о нас к Богу молитвенниче.

Кондак 12

Благодать Божия, юже приял еси сугубо во святом крещении и во иерейском рукоположении, не вотще в тебе бысть, отче Иоанне: рачением бо твоим употребил еси сию на пользу многим и во славу Дародателя ея: светлостию бо жития твоего и делы милосердными велъми прославися Отец небесный, и от множества уст, тобою духовно и телесно облагодетельствованных, возносится Тому великая песнь: Аллилуиа.

Икос 12

Поюще богоугодное твое от юности житие, и духовное от силы в силу восхождение, ублажаем праведную твою кончину и славное погребение благодатных твоих мощей, обретших вечный покой в созданной тобою девичей обители. Веруем же, яко и святая душа твоя упокоися в пресветлых райских селениях, ихже наследовати помози нам, возглашающим ти похвалы сицевыя:

Радуйся, течение временныя жизни равно и богоугодно скончавый: радуйся, веру правую непорочно сохранивый.

Радуйся, мирною христианскою кончиною праведность твою известивый: радуйся, покой вечный на небеси со святыми получивши.

Радуйся, радости праведных во обителех райских причастивыйся: радуйся, со множеством душ тобою спасение улучивших, блаженства вечнаго сподобивыйся.

Радуйся, с царственными новомученики Царство небесное наследивый: радуйся, с ними Царю славы предстояй, и о избавлении отечества нашего от безбожных враг молитвы возносяй.

Радуйся, великий православия поборниче: радуйся, непреодолимый благочестия защитниче.

Радуйся, сонными явленьми преславно чудотворяй: радуйся, инославныя в православие приводяй.

Радуйся, яко гроб твой источает исцеления: радуйся, яко имамы надежду всемирнаго твоего со святыми прославления.

Радуйся, Иоанне, новый Российский светильниче, и теплый о нас к Богу молитвенниче.

Кондак 13

О, всечестный отче Иоанне, не Кронштадтский токмо, но и всероссийский, паче же – всемирный светильниче и великий Христов угодниче! Приими от нас недостойных хвалебное сие пение, и благоприятными твоими ко Богу молитвами избави нас от бед временных и вечных: да сподобимся с тобою в царствии небеснем вечно воспевати: Аллилуиа (трижды).

Молитва

Отче Иоанне досточудне! Ты добродетельми многими к Богу приблизился еси, и дарований духовных от Него сподобился еси: недуги врачевати, страсти прогонятя и скорби утоляти. Темже смиренно молим тя: подаждь недугом нашим исцеление и страстем врачевание, находящая же на нас скорби утоли, и радость духовную в сердца наша всели. И помози нам подражательми быти святого твоего жития и всех благих твоих деяний, яко да сподобимся с тобою наследия царствия небеснаго. Отечеству нашему свобождение от безбожников у Господа испроси, мир и благоденствие ему возврати: скиптры благочестивых царей наших возстави и на многая лета утверди: да вси познают и уразумеют, коль велие имаши у Бога дерзновение, и прославят тебе ради всесвятое и великолепое имя Пресвятыя, единосущныя и нераздельныя Троицы, Отца и Сына и Святаго Духа, Единаго по существу Бога, Емуже честь и поклонение подобает в безконечныя веки веков. Амипь.

Тропарь, глас 5.

Благодати тезоимените, и тою от юности обогатился, молитвенник земли Российский богоприятен, и Царем благочестивым премудр советодатель был еси, врач же душ и телес изряден показался еси, Иоанне пречудне. Темже моли Христа Бога, Державу Российскую, с Царем благочестивым в мире и благоденствии сохраняти, и душам нашим даровати велию милость

Иоанновского монастыря

Акафист св. прав. Иоанну, пресвитеру Кронштадтскому, чудотворцу, читаемый в Иоанновском монастыре

Кондак 1

Избраннаго и вернаго во иереех Божиих восхваляем тя, богоносне отче Иоанне! Ты бо Евангельской Истине последуя, Христу всем сердцем сораспялся еси, струю чудес и исцелений всем верным источаеши и ко спасению их направляеши. Мы же, молитвами твоими в вере, надежде и любви укрепляеми, благодарно зовем ти: Радуйся, Иоанне, земли Российския молитвенниче предивный.

Икос 1

Ангела молитвы и проповедника покаяния ведаем тя, блаженне отче. Ходатайствуеши бо за нас у Престола Божия, да в разум истинный приидем и жизнь свою на путь спасения направим, взывая тебе:

Радуйся, благодати Божия сосуде избранный;

Радуйся, Премудрость Божию, яко млеко матери, сладостно впитавый;

Радуйся, Ангелу хранителю твоему, яко Товия древле, вседушевне последовавый;

Радуйся, боголюбивых родителей целомудренный плод чистоты непререкаемый;

Радуйся, в повиновении родителям своим благословение Божие стяжавый;

Радуйся, от юности твоея водительству Духа Святаго прилежавый;

Радуйся, всем сердцем твоим Бога возлюбивый;

Радуйся, в меру возраста Христова богомудренно возраставый;

Радуйся, Иоанне, земли Российския молитвенниче предивный.

Кондак 2

Предвидя, яко многия беды и соблазны грядут на Церковь Русскую и чада Божии в смятении будут, яко пастырь добрый, душу свою за паству свою готовый положити, глаголал еси людям: «Убойтесь соблазнов, стойте в вере Православной, мужайтесь, и крепитесь, и славьте Господа, взывая Ему: Аллилуиа».

Икос 2

Разумом Божественным просвещаемый, богословия струи животочныя источил еси, всеблаженне отче Иоанне, в посте и молитве словеса Божия со слезами в сердца верных сея, к свету истиннаго богопознания чад земли нашея призывал еси. Тии же, в любви Божии укрепляющеся, пояху тебе таковая:

Радуйся, Евангельския Истины пламенный ревнителю;

Радуйся, глаголов жизни вечныя неумолкаемый возвестителю;

Радуйся, равноангельным житием твоим достойно украшенный;

Радуйся, у Престола Божия о людях ходатаю верный;

Радуйся, от юности Церкви Христовой всем сердцем прилепивыйся;

Радуйся, Христу сораспятися о людях вседушевне возгоревыйся;

Радуйся, любовию Христовою сердце твое, аки ниву благоплодную, возделавый;

Радуйся, людям, в скорбех и печалех изнемогшим, состраданием и молитвою облегчение подававый;

Радуйся, Иоанне, земли Российския молитвенниче предивный.

Кондак 3

Силою Божественныя благодати, яко углем горящим у жертвенника Божия возжжен, светильниче многосветлый во граде Кронштадте просиял еси, отцев наших похвало, отче Иоанне. Сице бо во тьме греховней обуреваемых и соблазном богоборчества колеблемых зарею Божественнаго разума просветил еси и научил еси пети: Аллилуиа.

Икос 3

Имея любовь велию к людем, Кровию Сына Божия искупленным, потекл еси к неимущим благочестия, трезвения и страха Божия и отчаянием обуреваемым, пастырю добрый Иоанне, сих же кротостию и смиренномудрием покорив Христу, научил еси благодарно взывати тебе таковая:

Радуйся, сущих во тьме и сени смертней премудрый просветителю;

Радуйся, о спасении людей, в пучине греховней обуреваемых, благостный попечителю;

Радуйся, неведущих Бога и окамененных сердцем к покаянию пробуждаяй;

Радуйся, Божественною премудростию в писаниях твоих нас озаряяй;

Радуйся, сердец строптивых и злонравных благостное умягчение;

Радуйся, ленивых и коснеющих совестию щедролюбивое обличение;

Радуйся, Слова Божия и правды Его проповедниче неустрашимый;

Радуйся, житием благонравным козни духов злобы поднебесных победивый;

Радуйся, Иоанне, земли Российския молитвенниче предивный.

Кондак 4

Бурю злонравия воздвизаему на Церковь нашу Святую ведал еси, отче Иоанне, яко верный страж дома Господня, научал еси овцы Христовы бдети и право ходити в истенней вере и в заповедях Господних непорочно пребывати, да чистым сердцем и устами непрестанно взывают к Богу победную песнь: Аллилуиа.

Икос 4

Слышаще о тебе, яко ты еси сосуд избранный и благодатных даров преисполненный, подвигов милосердия и нищелюбия ревнитель, вдов и сирот, страждущих и обремененных утешитель и о нераскаянных грешницех молитвенник слезный, не токмо от Кронштадта, но и от всех конец земли потекоша к тебе людие Божии, исцеления от тебе получаху. С ними же и мы, о гресех своих кающеся, яко ходатаю о нас пред Богом теплу, умильно зовем ти:

Радуйся, сеятелю правды, слезами твоими землю нашу освятивый;

Радуйся, обличителю неправды, души верных от прелести греховныя свободивый;

Радуйся, свете сердец кротких и разумных, путь к Богу указуяй;

Радуйся, ученьми твоими, яко кормилица кроткая, нас греяй и питаяй;

Радуйся, всех скорбящих и обремененных неложное упование;

Радуйся, болящих и от духов злых страждущих благодатное врачевание;

Радуйся, сосуде избранный, дары Духа Святаго туне верным источивый;

Радуйся, не о людях токмо, но и о скотех милосердовавый;

Радуйся, Иоанне, земли Российския молитвенниче предивный.

Кондак 5

Яко небосветлая звезда священнолепным житием твоим просиял еси, пастырю Христов Иоанне! Богом дарованное тебе наследие от волков, губящих е, словом Божиим ограждал еси, пастырски взывая: возьмите Крест Господень, на Нем же Христос — Царь Славы — рукописание грехов наших изглади, в Немже миру востание во веки. Мы же, сим знаменающеся, поем с тобою Богу победную песнь: Аллилуиа.

Икос 5

Видевше тя Российстии людие дивно на свещнице церковней сияюща, правды Божия ищуще, к тебе притекаху, и яко другу Христову, исповедаху грехи своя. Мы же, обремененнии многими прегрешениями, к тебе, блаженне Иоанне, прибегаем и тако глаголем:

Радуйся, яко силою благодати, яже в тебе, немощнии духом в любви Божии укрепляются;

Радуйся, яко твоими молитвами кающиеся плена греховнаго свобождаются;

Радуйся, яко труды твоими алчущии и жаждущии Правды Христовой насыщаются;

Радуйся, яко благовестием твоим врази Христовы посрамляются;

Радуйся, яко молитвами твоими силы ада содрагаются;

Радуйся, яко воздеянием рук твоих, врата небесная верным отверзаются;

Радуйся, в умилостивление за народ наш молитву, яко кадило благовонное, херувимски Богу приносивый;

Радуйся, за неведущих правды и любве Божия молитися нас подвигнувый;

Радуйся, Иоанне, земли Российския молитвенниче предивный.

Кондак 6

Проповедницы чудных деяний твоих, блаженне Иоанне, явишася мнози: богатии и нищии, старцы и юноши. Ты бо всем любовь свою изливал еси. Темже не токмо православнии, но и иновернии силою молитв твоих милость Божию обретаху, поя Богу: Аллилуиа.

Икос 6

Возсиял еси житием твоим в Церкви Православней лучезарнее сияния севернаго, светом Евангелия Христова Отечество наше просвещал и от сетей вражиих чада ея ограждал. Темже и ныне молим Господа Сил, да любовь святая утвердится в сердцах наших, во еже ни скорбь, ни теснота, ни смерть не возмогут нас разлучить от любве Божия. И тако достигше сего, тебе воззовем:

Радуйся, яко Божиим смотрением грядущая на ны предвозвестивый;

Радуйся, тесным путем в заповедях Божиих ходити нас научивый;

Радуйся, в скорбех и печалех сущим источник радости в Бозе указавый;

Радуйся, оную радость, яко зеницу ока, свято хранити нам завещавый;

Радуйся, десницею и шуйцею оружие Правды Божия содержаяй;

Радуйся, в словесе истины и любви нелицемерней Сыну Громову уподобивыйся;

Радуйся, порфирою покаяния всех облекаяй;

Радуйся, диадимою благодати славно увенчанный;

Радуйся, Иоанне, земли Российския молитвенниче предивный.

Кондак 7

Хотя Всеблагий Господь спасти люди земли нашея и, яко злато в горниле огненнем, очистити я, вложи в уста твоя, всеблаженне, дух премудрости и разум провидца, во еже чрез покаяние сердечное и сокрушение слезное преуготовати я в вере непоколебимых к жертвенному служению, да со всеми святыми, в земле Российстей просиявшими, ангельски вопиют Богу: Аллилуиа.

Икос 7

Новаго избранника Божия, всеблаженне Иоанне, ведяще тя у Алтаря Господня за всех молитвою слезною Христу сраспинающася, боголюбивии людие с верою к тебе притекаху и душевне и телесне исцеляхуся. Темже и мы, в немощи сущии, молим тя прилежно: воздвигни руце твои и не премолчи за ны ко Господу, якоже отец о чадех своих, да умножит Господь милость Свою на нас, приносящих ти сицевая:

Радуйся, у Престола Божия прилежный о нас печальниче и ходатаю;

Радуйся, покаяния слезнаго усердный глашатаю;

Радуйся, образе неусыпнаго делания, Христу Богу работати прилежно нас наставляеши;

Радуйся, яко на божественней страже веры апостольския стояти нас утверждаеши;

Радуйся, образ воздержания и целомудрия добре показавый;

Радуйся, суеверия, ереси и злохуления от стада твоего отсекавый;

Радуйся, сущих во тьме неведения славный просветителю;

Радуйся, душ человеческих от суеты житейския мудрый восхитителю;

Радуйся, Иоанне, земли Российския молитвенниче предивный.

Кондак 8

Странное чудо видим на тебе, предивный пастырю Христов Иоанне! Сама бо Пречистая Матерь Божия ублажи тя и последующих тебе и с радостию благоволение Божие всем возвести: о милейшие вы чада Отца Небеснаго! Сице бо радость Церкви Небесныя о подвизе земныя предвозвести. Сего ради и мы, надеждею на предстательство о нас Матери Господа Сил согреваеми, вопием Царю всех веков: Аллилуиа.

Икос 8

Весь желанием Божиим распаляем, носитель любве Христовы явился еси, пастырю добрый. В ней бо милость и истина сретостася, правда и мир облобызастася; всякая же лесть упразднися, еретическое же злонравие, яко тля, попалися, скорби же человеческия елеем милосердия твоего утолишася. Мы же, нерадивии, сокровищ сих не стяжахом, праведным судом Божиим многим скорбем и печалем достойни явихомся. Но, ведуща тя помощника неусыпна, умильно зовем ти:

Радуйся, любве Христовой неутомимый носителю;

Радуйся, мира и правды ревностный сеятелю;

Радуйся, веры православныя незыблемый хранителю;

Радуйся, благочестия и добронравия насадителю;

Радуйся, о всем мире печальниче и слезный молитвенниче;

Радуйся, Церкве Христовой немеркнущий светильниче;

Радуйся, отцев наших похвало, нам же надеждо и утешение;

Радуйся, Богоизбранный пастырю, Святыя Руси благодатное украшение;

Радуйся, Иоанне, земли Российския молитвенниче предивный.

Кондак 9

Всем сущим в бедах и скорбех житейских воздвиже Господь на радость пастыря и чудотворца предивна Иоанна, да хромыя и расслабленныя, слепыя и от духов злых томимыя исцелит, в пагубнем пиянстве и супружестей неверности растлеваемыя к непостыдней жизни призовет, а яже во озлоблении сущия к Богу приведет и сице в душах верных царство Правды Божия насадит, да воспоем вси спасительную песнь Богу: Аллилуиа.

Икос 9

Вития многовещаннии недоумеют изъясняти силу молитвы твоея, Иоанне предивне, егда три юноши, дерзнувших поглумитися о тебе и молитве твоей, спасительно наказал еси. Узрев же я кающихся и слезно молящихся, исцеление злохулителю от Бога испросил еси. Тии же, познавше молитвы твоея силу чудодейственную и любве твоея милосердие теплейшее, яко Божия провидца, ублажиша тя похвалами таковыми:

Радуйся, благое икономство чина своего богомудренно соблюдый;

Радуйся, данный тебе залог, Тело Христово, цел и невредим до последнего твоего издыхания сохранивый;

Радуйся, скрижали Богоначертанныя обою Заветов достойне возвестивый;

Радуйся, Церковь Христову благочестием пастыря добра прославивый;

Радуйся, истиннаго просвещения и христианскаго благочестия ревностный насадителю;

Радуйся, кающихся грешников, сирых и убогих милостивый покровителю;

Радуйся, мудрый путеводителю, стези правды юным указуяй;

Радуйся, судие нелицеприятный, зломудрствующия любовию наказуяй;

Радуйся, Иоанне, земли Российския молитвенниче предивный.

Кондак 10

Спасти хотя души ближних своих, ересьми и маловерием обуреваемыя, противу кознем диавольским воздержанием и смирением вооружился еси, отче Иоанне, апостольское и святоотеческое веры исповедание твердо сохранив. Жертвенною же любовию Христу сраспинаяся, душу твою за спасение народа Божия положив, Царствия Небеснаго достигл еси, идеже со Ангелы и лики святых непрестанно Бога славословя, поминай нас, славную память твою празднующих и поющих Богу: Аллилуиа.

Икос 10

Стена твердая бысть любовь твоя ко Господу, в ней же утвердися сердце твое, богоносне отче Иоанне. Сего ради всем притекающим к тебе с верою прибежище и утверждение явился еси, да всяческая Христу приобрящеши. Темже и нам, к тебе припадающим, буди стена крепка и ограждение непреодолимое, да не посмеются о нас, хотящия нам злая, во еже в мире и любве Христове пребывати и приносити сия похвалы:

Радуйся, светильниче неугасимый, огнем Духа Святаго возжженный;

Радуйся, крине, присно благоухаяй, росою благодати Божия напоенный;

Радуйся, росо сладкоплодная, благодатными дары верных оживотворяющая;

Радуйся, соле земли, от греховнаго тления нас сохраняющая;

Радуйся, в море житейстем обуреваемым тихое пристанище;

Радуйся, яко душевне и телесне изнемогающим о помощи Божией умоляеши;

Радуйся, сердцеведче предивне, верныя от лжемудрствования ограждаяй;

Радуйся, силою молитвы чистыя союз супружеския верности укрепляяй;

Радуйся, Иоанне, земли Российския молитвенниче предивный.

Кондак 11

Песнь достохвальную приносим ти, всеблаженне отче Иоанне, всем житием твоим прославившему Бога. И якоже видехом тя на земли долу у Престола Господня за всех и за вся Владыку мира умолявшаго, сице и ныне на Небеси горе вознеси молитвы твоя, во еже непоколебимей быти Церкви нашей, да из рода в род в Отечестве нашем благочестно славится Имя Триединаго Бога поющими Ему: Аллилуиа.

Икос 11

Светозарную свещу, во мраце жития сущим, зрим тя, Богом избранне отче Иоанне, ты бо на Небесех у Престола Божия в сонме святых и Сил Небесных о нас присно ходатайствуеши, воззри на нас, чад твоих, облегчи наша скорби и исцели наша недуги, да зовем ти:

Радуйся, яко в подвизе твоем Имя Пресвятыя Троицы дивно прославися;

Радуйся, яко благочестием веры твоея Церковь Христова украсися;

Радуйся, яко состраданием к ближним твоим скорби, и болезни, и печали всяческия утоляются;

Радуйся, яко молитвами твоими кающиися грешницы Царствию Небесному приуготовляются;

Радуйся, спасительных благ земных и небесных щедрый подателю;

Радуйся, от враг видимых и невидимых надежный избавителю;

Радуйся, яко в земном Едеме, Церкви Христовой, подвигом добрым просиял еси;

Радуйся, яко доброты райския, уготованная праведным, восприял еси;

Радуйся, Иоанне, земли Российския молитвенниче предивный.

Кондак 12

Благодатных даров Духа Святаго кладезь преисполненный яви в тебе Господь, отче наш Иоанне, да тобою и мы сих причастницы будем и тако познаем милость Божию к нам, яко не отступит, ниже посрамит нас Господь, егда благодарными усты и чистым сердцем, уповающе на милость благоутробия Его, воспоем Ему: Аллилуиа.

Икос 12

Поюще твое достохвальное житие на земли и славу, юже стяжал еси на Небеси, молим тя, блаженне Иоанне, вознеси о нас молитвы Богу, да помиловани будем в день судный и, спасаеми твоими молитвами, тако тебе воззовем:

Радуйся, богоизбранне и богопрославленне пастырю земли Российския;

Радуйся, яко воспел еси имя Божие, аки орган мусикийский;

Радуйся, пророком и апостолом добре поревновавый;

Радуйся, бежати гнева Божия и творити плоды покаяния мудре наставивый;

Радуйся, об Отечестве и народе нашем теплый молитвенниче;

Радуйся, веры православныя истинный исповедниче;

Радуйся, пресветлый лучу, путь к жизни вечней осияваяй;

Радуйся, неисчерпаемую благость Божию нам открываяй;

Радуйся, трапезо неоскудеваемая, от неяже монаси и мирстии питаются;

Радуйся, учителю Правды Божия, еюже старцы и юноши украшаются;

Радуйся, яко ихже даде тебе Господь, сотворил еси я Богу в радование;

Радуйся, яко от небожителей приял еси о Господе целование.

Радуйся, Иоанне, земли Российския молитвенниче предивный.

Кондак 13

О всеблаженне отче Иоанне, всероссийский пресветлый светильниче и предивный чудотворче! Приими хвалебное сие пение и умоли Христа Бога в мире и благочестии утвердити Святую Церковь, нас же всяких бед избавити и в единомыслии веры в союзе любве Христовы соблюсти, да единеми усты и единем сердцем воспоем с тобою Богу: Аллилуиа.

Сей кондак глаголати трижды, посем икос 1 и кондак 1.

Молитва первая

О великий угодниче Христов, святый праведный отче Иоанне Кронштадтский, пастырю дивный, скорый помощниче и милостивый предстателю!

Вознося славословие Триединому Богу, ты молитвенно взывал:

Имя Тебе — Любовь: не отвергни меня, заблуждающагося.

Имя Тебе — Сила: укрепи меня, изнемогающаго и падающаго.

Имя Тебе — Свет: просвети душу мою, омраченную житейскими страстями.

Имя Тебе — Мир: умири мятущуюся душу мою.

Имя Тебе — Милость: не переставай миловать меня.

Ныне благодарная твоему предстательству всероссийская паства молится тебе:

Христоименитый и праведный угодниче Божий!

Любовию твоею озари нас, грешных и немощных, сподоби нас принести достойные плоды покаяния и неосужденно причащатися Святых Христовых Тайн. Силою твоею веру в нас укрепи, в молитве поддержи, недуги и болезни исцели, от напастей, врагов видимых и невидимых избави.

Светом лика твоего служителей и предстоятелей Алтаря Христова на святыя подвиги пастырскаго делания подвигни, младенцем воспитание даруй, юность настави, старость поддержи, святыни храмов и святыя обители озари!

Умири, чудотворче и провидче преизряднейший, народы страны нашея, благодатию и даром Святаго Духа избави от междоусобныя брани, расточенныя собери, прельщенныя обрати и совокупи Святей Соборней и Апостольстей Церкви.

Милостию твоею супружества в мире и единомыслии соблюди, монашествующим в делах благих преуспеяние и благословение даруй, малодушныя утеши, страждущих от духов нечистых свободи, в нуждах и обстояниих сущих помилуй и всех нас на путь спасения настави.

Во Христе живый, отче наш Иоанне, приведи нас к Невечернему Свету жизни вечныя, да сподобимся с тобою вечнаго блаженства, хваляще и превозносяще Бога во веки веков. Аминь.

Молитва вторая

О великий чудотворче и предивный угодниче Божий, богоносне отче Иоанне! Призри на нас и внемли благосердно молению нашему, яко великих дарований сподоби тя Господь, да ходатаем и присным молитвенником за нас будеши. Се бо страстьми греховными обуреваеми и злобою снедаеми, заповеди Божия пренебрегохом, покаяния сердечнаго и слез воздыхания не принесохом, сего ради многим скорбем и печалем достойни явихомся.

Ты же, отче праведный, велие дерзновение ко Господу и сострадание к ближним своим имея, умоли Всещедраго Владыку мира, да пробавит милость Свою на нас и потерпит неправдам нашим, не погубит нас грех ради наших, но время на покаяние милостивно нам дарует.

О, святче Божий, помози нам веру православную непорочно соблюсти и заповеди Божии благочестно сохранити, да не обладает нами всякое беззаконие, ниже посрамится Правда Божия в неправдах наших, но да сподобимся достигнути кончины христианския, безболезненныя, непостыдныя, мирныя и Таин Божиих причастныя.

Еще молим тя, отче праведне, о еже Церкви нашей Святей до скончания века утвержденней быти, Отечеству же нашему мир и пребывание испроси и от всех зол сохрани, да тако народы наши, Богом храними, в единомыслии веры и во всяком благочестии и чистоте, в лепоте духовнаго братства, трезвении и согласии свидетельствуют: яко с нами Бог! В Нем же живем и движемся, и есмы, и пребудем во веки. Аминь.

Кондак, глас 3-й.

Любовию Божественною из млада уязвився, мирских сластей и сожития законней супружницы уклонился еси, отче Иоанне. Сего ради ликом девственников на небесех сочислился еси, с ними же молися Христу Богу умирити мир и спасти души наша.

Пюхтицкий

Акафист святому праведному Иоанну Кронштадтском, читаемый в Пюхтицком монастыре

Творение монахини Иоанны

Кондак 1

Великому пастырю и угоднику Божию, негасимою свещею за святое православие горящему, любовию Евангельскою ко всем людем от юности озаренному, благодарно воспоим, яко избранному сосуду Божией благодати: радуйся, праведный отче наш Иоанне, пастырю дивный и великий пред Богом молитвенниче.

Икос 1

От младенства Христа Бога паче всего возлюбивый и сердце горе имевый, узрел еси, шестолетен быв, блаженне Иоанне, Ангела Божия хранителя своего, рекшаго: да стоит окрест тя во спасение и охранение, Сего ради, яко избранника Божия, с любовию тя восхвалим:

Радуйся, благочестиваго кореню чадо возлюбленное;
Радуйся, в страсе Божием от колыбели взращенный.
Радуйся, с детских лет любовию всех обнимавый;
Радуйся, отроча тихий и кротцый, на помощь всем поспешавый.
Радуйся, Ангела хранителя благими нравы веселивый;
Радуйся, николиже того чим опечаливый.
Радуйся, от младенства Церковь Христову возлюбивый;
Радуйся, вся своя чаяния в храме Божием сосредоточивый.
Радуйся, святыя угодники измлада почитавый;
Радуйся, их подвиги во имя Христово себе во образ вменивый.
Радуйся, сопутником детства святое Евангелие имевый;
Радуйся, с ранних лет с благовестием Христовым сроднивыйся.
Радуйся, праведный отче наш Иоанне, пастырю дивный и великий пред Богом молитвенниче.

Кондак 2

Видяще тя, праведниче дивный Иоанне, измлада по Бозе возревновавшаго, душею чистою Духа Святаго приявшаго и Им таинственно ведомаго, умиленно поем Богу: Аллилуиа.

Икос 2

Великаго светильника Церкви Православныя сиятельнаго Златоуста учителем своим почитавый, богомудре Иоанне, дерзновение ко Господу святителя Константинопольскаго восприял еси. Темже, яко предстателю нашему, взываем ти сице:

Радуйся, познанию премудрости Божией младая лета посвятивый;
Радуйся, прелесть мира сего скоро распознавый.
Радуйся, заповеди Христовы возлюбивый;
Радуйся, чиста от страстей себе соблюдый.
Радуйся, отца и матерь сыновне почитавый;
Радуйся, под страхом смерти в недузе тяжцем пост не нарушивый.
Радуйся, яко сокровище из сокровищ, книзи святаго Златоуста полюбивый;
Радуйся, в смирении дар пастырскаго слова из них почерпнувый.
Радуйся, измлада о спасении людей радевый;
Радуйся, души, во тьме пребывающия, звати к свету Христову от юности стремивыйся.
Радуйся, видения храма Божия и в нем себе в сане иерейстем сподобивыйся;
Радуйся, в храме сем до кончины своея Господу и людем послуживый.
Радуйся, праведный отче наш Иоанне, пастырю дивный и великий пред Богом молитвенниче.

Кондак 3

Небесным лучем Триединаго Бога возсиял еси, отче, егда люди Земли Российстей, празднующе память досточуднаго ревнителя Святыя Троицы Спиридона Тримифунтскаго, обретоша в тебе, праведниче дивный Иоанне, в день сей промыслительне во иерея рукоположеннем, своего заступника и веры Православныя поборника, поющаго верно Богу: Аллилуиа.

Икос 3

Любы Евангельскую ко всем людем являя, службы Божия в храме присно совершая, покаяния проповедником стал еси, пастырю Кронштадтский Иоанне, греси мнози на себе принимая, души грешныя молитвою и любовию согревая, к Чаше спасения звал еси неустанно. Темже поем ти, яко богоносному отцу нашему, таковая:

Радуйся, избранный во иереех Церкве Христовы служителю;
Радуйся, святыни честное жилище.
Радуйся, николиже догматы Церкве и уставы ея не преступивый;
Радуйся, святому Православию даже до последняго часа своего потрудивыйся.
Радуйся, хулу и клевету и вся наветы кротко претерпевый;
Радуйся, суетою мира сего себе не запятнавый.
Радуйся, пастырю благодатный;
Радуйся, столпе Церкве Православныя непоколебимый.
Радуйся, лозо неоскудевающая винограда Христова;
Радуйся, плод сторичный во спасенных душах Богу принесший.
Радуйся, образ чистоты житием твоим всем явивый;
Радуйся, вся, яже ко благоугождению Господеви, и мудрствовати и деяти нас наставивый.
Радуйся, праведный отче наш Иоанне, пастырю дивный и великий пред Богом молитвенниче.

Кондак 4

Вся во славу Божию творити от первых дней священства за правило себе вменивый, ни сна, ни отдыха не ведал еси, любвеобильне отче Иоанне. Имуще сердце, чужому горю сострадавшее, распенше плоть свою, до слез и пота о всех молился еси. Призрев на таковую к людем любы твою самозабвенную, посла Господь ти дар помощи чудодейственныя и молитвы дерзновенныя. Ты же, лучу светлый, во мраце страстей блистаяй, смиренно воспел Богу: Аллилуия.

Икос 4

Апостолом Христовым уподобивыйся, денно и нощно шел еси в лачуги убогия, святый отче Иоанне. Грязи и смрада не бояся, злаго смеха не страшася, возжигал еси в душах падших, отверженных Духа Святаго лампады спасения. Мы же пред величием твоим главы преклонше, поем ти, человече Божий Иоанне:

Радуйся, сирых защитниче;
Радуйся, немощных помощниче.
Радуйся, странных прибежище;
Радуйся, гонимых покрове и пристанище.
Радуйся, скорбящих утешение;
Радуйся, плачущих радование.
Радуйся, кротцых надеждо и спасение;
Радуйся, гордых вразумление.
Радуйся, заблуждших исправление;
Радуйся, падших возстание.
Радуйся, света Евангельскаго блистание;
Радуйся, духов злобы всемощное отгнание.
Радуйся, праведный отче наш Иоанне, пастырю дивный и великий пред Богом молитвенниче.

Кондак 5

О сирых и падших радея, заложил еси, пастырю добрый, дом трудолюбия в граде Кронштадте, дабы души людския трудом и молитвою спасати, уча всех ближняго любити и киимждо днем живота своего Творца славити и пети Богу: Аллилуиа.

Икос 5

Милосердыми делы твоими вся Земля Российская украсися и далече за пределы ея свет любве велия твоея пролияся. Мы же, восхваляя тя, святый безсребренниче Иоанне, умиленно взываем ти сице:

Радуйся, сердце, в бедах сущия согревающее;
Радуйся, душе, тысячи бедных, больных и убогих  в себе вместившая.
Радуйтеся, руци, неленостно людем послужившия;
Радуйтеся, рамена, тяготы грешников на себе носившия.
Радуйся, врачу, состраждуяй боли и слезам к тебе притекающих;
Радуйся, образе милости преизобильныя, николиже не ветшающий.
Радуйся, смирение, тихостию своею буйство исцеляющее;
Радуйся, кротосте, неизчетныя дары Небесныя вместившая.
Радуйся, от погибели заблудшия исхитивый;
Радуйся, отчаянным врата рая приблизивый.
Радуйся, любве Христовы Апостоле верный;
Радуйся, сосуде благодати Божией избранный.
Радуйся, праведный отче наш Иоанне, пастырю дивный и великий пред Богом молитвенниче.

Кондак 6

Нова дивна делателя вертограда Христова страна Российская стяжа, егда изшел еси на ниву Господню, яко отроков наставник и Закона Божия учитель, право поющий Богу: Аллилуиа.

Икос 6

Зря во всяцей душе лепоту Божию, безценное чадо Отца Небеснаго, возжигал еси в сердцах ученики своя свет истинный, неветшающий. Темже и мы, яко чада, к тебе прибегаем и молимтися: научи нас, якоже и ты, Бога любити и за вся Его великия благодеяния непрестанно славити и благодарити. Не остави без твоего пастырскаго попечительства, учителю славный и добрый наставниче, и нас, к тебе взывающих:

Радуйся, яко солнце души отрочи освещавый;
Радуйся, поросль добрую тем взрастивый.
Радуйся, всем сердцем Бога возлюбивый;
Радуйся, и ученики своя искренне Того любити научивый.
Радуйся, добродетельнаго жития всем образ явивый;
Радуйся, Православию верно послуживый.
Радуйся, семена веры живыя повсюду насеевавый;
Радуйся, хранити заповеди Божия неустанно призывавый.
Радуйся, милостивый душ израненных врачевателю;
Радуйся, грешных усердный взыскателю.
Радуйся, старых и младых правый учителю;
Радуйся, страны Российския духовный просветителю.
Радуйся, праведный отче наш Иоанне, пастырю дивный и великий пред Богом молитвенниче.

Кондак 7

Звездою многосветлою явился еси, чудотворче дивный Иоанне: больныя исцеляяй, немощныя подкрепляяй, от смерти лютыя, вечныя прозорливо ограждаяй. Вся Россия твоими чудесы исполнися, в град Кронштадт людие непрестанно притекаша, с верою и упованием к тебе взываша, поя Богу: Аллилуиа.

Икос 7

Дивно в тебе Господь Бог прославися, егда верою живою твоею мертвии духом во всех концех земли оживляшася, дуси нечистии изгоняшася и со одра расслабленнии воздвигашася. Сего ради и мы благодарственно поем ти, чудотворче и целителю всехвальне Иоанне:

Радуйся, яко невозможно изчести вся чудеса, по твоим молитвам совершаемая;
Радуйся, надеждо в скорбех к тебе прибегающих.
Радуйся, и не чающих о твоей помощи милосердное вспоможние;
Радуйся, и не ведавших тя любвеобильное от бед спасение.
Радуйся, хулителей таинств скорое вразумление;
Радуйся, безчинных верное исправление.
Радуйся, всем по вере исцеления даровавый;
Радуйся, паче и неверныя николиже отринувый.
Радуйся, границ неведующу любы имевый;
Радуйся, тем для дел благих границы держав дальних отворивый.
Радуйся, инославныя верою истинною, Христовою, просвещаяй;
Радуйся, вся языцы милуяй и любовию своею обнимаяй.
Радуйся, праведный отче наш Иоанне, пастырю дивный и великий пред Богом молитвенниче.

Кондак 8

Святаго Православия поборниче, богомудре отче Иоанне, возжигал еси неустанно на родной земли лампады спасения — храмы и монастыри русския, Державу хранящия и души людския от пагубы ограждающия, Творцу поющия: Аллилуиа.

Икос 8

На горе, освященной явлением Царицы Небесныя, Господь сподоби тя, избранниче дивный Иоанне, во имя Успения Его Пречистыя Матере преславный храм и обитель чудную заложити и во ону дев чистых, дщерей духовных своих собрати, дабы Матери Божией служити и тем Бога присно славити. Мы же, недостойнии, к заступлению твоему прибегая, яко пастырю нашему возлюбленному, благодарними усты взываем:

Радуйся, якоже по благоволению Пречистыя Владычицы нашея Богородицы первейшая обитель на Святей Руси во имя Успения Ея заложена бысть, тако и твоя обитель первая, пастырю добрый Иоанне, по смотрению Божией Матери, во славу Успения устроена бысть, традицию древнерусскую прияше;

Радуйся, якоже из Царьграда во Киев строители образ Успения — благословение Божией Матери — принесоша, тако и твои сестры, отче Иоанне, Успенскую икону, дарованную некогда Самою Владычицею Небесною, во обители присно хранят.
Радуйся, яко икона сия чудотворная в соборе, открывшемся тебе в видении, блаженне Иоанне, пребывает;
Радуйся, яко многая души окамененныя в мире сем, забывшем Бога оживляет.
Радуйся, якоже обители сей до скончания века стояти тобою предречеся;
Радуйся, милостию Божиею вся бури ратныя и безбожныя до сего дне мимо ея пронесошася.
Радуйся, истинным пастырем и игуменом обители на святей сей горе присно пребываяй;
Радуйся, попечительством своим николиже ея не оставляяй.
Радуйся, праведный отче наш Иоанне, пастырю дивный и великий пред Богом молитвенниче.

Кондак 9

Христовых Тайн благоговейный служителю, горняя присно мудрствуя, а не земная, был еси во образ людем и пастырем, пред престолом Божиим духом горя и поя Богу: Аллилуиа.

Икос 9

Священный сан высоко нося, искал еси прежде Царствия Божия и правды Его, пред Лицем Божиим себе присно зряще. Тесным и скорбным путем в мире шествуя, в воздержании, смирении, пощении и заповедей Божиих непорочном хранении подвиги мученик и преподобных совокупил еси и в вечныя кровы Отца Небеснаго со святыми водворился еси. Мы же на пресветлый лик твой благоговейно взирая, поем ти, праведниче Божий Иоанне:

Радуйся, воине Христов, в брань с духами злобы поднебесными безстрашно вступивый;
Радуйся, чада своя тем верно защитивый.
Радуйся, клянущих ты благословлявый;
Радуйся, за гонящих ты непрестанно моливыйся.
Радуйся, свете, омраченныя страстьми сердца наша просвещаяй;
Радуйся, от работы вражия тем кийждодневно нас избавляяй.
Радуйся, от стрел демонских правое охранение;
Радуйся, лести и козней диавольских верное посрамление.
Радуйся, узами любве Христовы чтущих тя крепко связавый;
Радуйся, николиже их в беде не оставивый.
Радуйся, яко предстательством твоим от язв греховных исцеляемся;
Радуйся, яко твоими молитвами безконечныя жизни сподобляемся.
Радуйся, праведный отче наш Иоанне, пастырю дивный и великий пред Богом молитвенниче.

Кондак 10

Новый пророче явился еси, отче Иоанне, зряще да углебоша языцы в пагубе и готови пасти в яму, юже соделаша. Звал еси Русь Святую веры и Церкве твердо держатися, да быв богомерзское сонмище и пагубное соборище не обратитися. Но, яко Иерусалим, избивый пророки и камением побивавый посланныя к нему чада Божия собрати, тако и над тобою, праведниче и пророче российский Иоанне, лживии и нечестивии глумишася и в безумии и гордых очию ослеплении, яко вороны чернии, тебе гнаша и речам твоим, на погибель свою, не внимаша. Фарисее же, слово твое слышавше, како некогда притчи Христовы, разумеша, яко о них глаголеши, и над тобою, мужу непорочен, трезвен, честен и учителен, с лютою злобою ругашася и до смерти тебе поносиша. Ты же, за вся славяще и благодаряще, воспел Богу: Аллилуиа.

Икос 10

Праведный гнев Божий страну Российскую потрясе, егда твоим глаголам языки не вняша и от Господа Бога своего отрекошася. Темже молимтися: скорбь верных чад твоих видяще, подаждь всем, во мраце безбожия пребывающим, духовное озарение и глубокое покаяние, да обратившеся ко Господу, милости Его и благодати неизреченныя людие Земли Российския сподобятся. И яко молитвеннику нашему и предстателю, в смирении глаголем таковая:

Радуйся, очей ослепленных прозрение;
Радуйся, хулителей и гонителей твоих скорое посрамление.
Радуйся, Святыя Троицы славный угодниче;
Радуйся, покаяния велегласный проповедниче.
Радуйся, спасительными путьми непреткновенно ступати всех наставляяй;
Радуйся, мрак духовнаго неведения присно разгоняяй.
Радуйся, от уз смерти лютыя милосердно избавляяй;
Радуйся, в Живот Вечный непрестанно просвещаяй.
Радуйся, яко огнем любви своея лед гордыни расплавляеши;
Радуйся, яко чистотою своею пламень страстей угашаеши.
Радуйся, омывати грехи слезами покаяния отечески призываеши;
Радуйся, тем геенны адския верно избавляеши.
Радуйся, праведный отче наш Иоанне, пастырю дивный и великий пред Богом молитвенниче.

Кондак 11

Славныя жизни во Христе дивное сияние явил еси, праведный отче Иоанне, в своем пастырстем людем завещании — твоих рук честных творении. Отворил еси чадам твоим своея души пламнное веры и любве ко Господу горение, минуты духовнаго созерцания и покоя в Бозе благоговейнаго. Мы же, благодарнии, поем Богу: Аллилуиа.

Икос 11

Благочестия изрядный наставниче, даровал еси всем людем, алчущим спасения, опыт свой многотрудный на пути всемощнаго духовнаго возрастания и добродетелей Евангельских преизобильнаго стяжания. Писания твоя языки мнози истинным благочестием своим удивляше, учебником спасения и в брани с врагом оружием чудесным сташа. Мы же за утешение велие и радование несказанное, твоими труды нам дарованныя, со благодарением поем ти, отче Иоанне:

Радуйся, духовныя радости сияние;
Радуйся, света Божия озарение.
Радуйся, душ наших утешение;
Радуйся, печалей и скорбей скорое отгнание.
Радуйся, лучу небесный, сердца наша освещаяй;
Радуйся, пастырю добрый, души чад своих на камени веры воздвизаяй.
Радуйся, в брани духовней нас укрепляяй;
Радуйся, от прелести фарисейския строго охраняяй.
Радуйся, простоте младенчестей нас научаяй;
Радуйся, верою и любовию присно горяяй.
Радуйся, ересей отсекателю;
Радуйся, святых Святейшему Слову верный служителю.
Радуйся, праведный отче наш Иоанне, пастырю дивный и великий пред Богом молитвенниче.

Кондак 12

Поюще дивнаго во святых Своих Царя Небеснаго, многими чудесы тя, праведниче Иоанне, прославльшаго, молимтися, милосердие твое призывающе, дабы светильницы наши не угасли и наполнили бы мы сосуды душ наших елеем дел благих и всем сердцем вознесли Богу: Аллилуиа.

Икос 12

Празднующе память твою, пение хвалебное приносим ти, досточудне отче Иоанне, яко Христу последовавше, с Богом на земли сопребывал еси и ныне во веки с Ним пребываеши:

Радуйся, якоже Спаситель торгующия из Храма Божия изгнаше, тако и ты, отче Иоанне, из храма души человеческия — предуготовленнаго дому Господня — всяку мерзость, противную Богу изгонял еси;
Радуйся, якоже Учитель с мытари и грешники ядоше и пияше, тако и ты, святый отче, в лачугах бедных со отверженными трапезу убогую делил еси и плакал еси с плачущими, и радовался еси с радовавшимися.
Радуйся, яко Агнец прямо стригущаго Его безгласен, поношения от имущих души непросвещенныя и во тьме бывшия претерпел еси;
Радуйся, яко Той, тяжце сердцем о скорбящих болел еси и любовию своею горе покрывал еси.
Радуйся, яко Той, ревностен был еси, отче, ко спасению из льстивых лап волка овцы, неведущия Пастыря своего;
Радуйся, яко Пастырь Добрый, душу свою за люди своя положил еси.
Радуйся, великий чудотворче и целителю;
Радуйся, молитвы дерзновенныя, простоты сердечныя и агнче незлобивости учителю.
Радуйся, спасения нашего богомудрый наставниче;
Радуйся, Православия верный поборниче.
Радуйся, пророче Земли Российския и ея великомучениче;
Радуйся, яко некогда страдания избыточествовали в тебе, тако ныне избыточествует утешение.
Радуйся, праведный отче наш Иоанне, пастырю дивный и великий пред Богом молитвенниче.

Кондак 13

О великий праведниче и чудотворче Иоанне! Исповедующе тя, яко заступника нашего и предстателя, аще бо и недостойны есмы таковаго отца и ходатая, к тебе припадаем: приими от нас, недостойных и грешных, сие малое приношение и умоли милостиваго Бога избавитися нам муки вечныя и геены огенныя, да сподобимся вместе с тобою, возлюбленный пастырю наш, присно пети во Святей Троице Единому Богу: Аллилуиа.

Сей кондак глаголи трижды, затем икос 1-й «От младенства…» и кондак 1-й «Великому пастырю..».

Для келейного чтения по благословению митр. Германа

Акафист святому праведному Иоанну Кронштадтскому

Благословляется для келейного прочтения.
Герман, Митрополит Волгоградский и Камышинский.

Кондак 1 , глас 8

Избранному во иереях, пастырю великому, молитвеннику неусыпному, земли Русския светильнику неугасимому, пресвитеру Божию Иоанну радостно взываем:

Радуйся, Иоанне, Церкви Российския пастырю предивный.

Икос 1

Ангела-хранителя твоего в светлости неизреченной, отроча младо быв, яве узрел еси, досточудне отче Иоанне. И тако  избранника Божия тя ведуще, сице глаголем:

Радуйся, родителей благочестивых утешение.
Радуйся, ангела-хранителя увеселение.
Радуйся, молитве в доме отчем навыкнувый.
Радуйся, послушание с детства возлюбивый.
Радуйся, яко в бедности учение проходил еси.
Радуйся, яко и тогда попечение о сродниках имел еси.
Радуйся, всем сердцем Бога возлюбивый.
Радуйся, праведным житием Ему угодивый.
Радуйся, Иоанне, Церкви Российския пастырю предивный.

Кондак 2

Видевше тебя, предивне отче Иоанне, от возраста юна в благодати Божией пребывающа и ею в добродетельнем житии наставляема, имеем тя во образ и подражание и умиленно поем Христу Богу: Аллилуиа.

Икос 2

Разум твой от лет отроческих в чтение Священнаго Писания углубил еси, Иоанне богомудре. Темже взываем ти, умоли милостиваго Бога, да сподобит быти причастниками благодатного труда сего и нас, восписующих тебе таковая:

Радуйся, благодати Божией носителю.
Радуйся, Евангельской Истины служителю.
Радуйся, благочестия твердый насадителю.
Радуйся, Царствия Божия возвестителю.
Радуйся, яко прелести мира скоро распознал еси.
Радуйся, яко от юности Богу себя предал еси.
Радуйся, предстоящих престолу Божию сотаинниче.
Радуйся, Православия верный поборниче.
Радуйся, Иоанне, Церкви Российския пастырю предивный.

Кондак 3

Силою Божественныя благодати яко светильник многосветлый просиял еси, отче праведный Иоанне. Просветив же люди, во тьме греховней седящия, наставлял их пети Богу: Аллилуиа.

Икос 3

Имея о тебе особое промышление, призвал тя Господь, Иоанне многотрудне, в священном сане на подвиг любви деятельной. Пастырское служение совершая, не ведая ни сна, ни покоя, ты потекл еси к бедным людям града Кронштадта. Мы же, ведуще сие, вопием ти сице:

Радуйся, Православныя Церкви похвало и радование.
Радуйся, страны Российския славо и украшение.
Радуйся, пути спасительного истинный учителю.
Радуйся, труда народного мудрый устроителю.
Радуйся, яко множество людей к труду приобщил еси.
Радуйся, яко дома трудолюбия основал еси.
Радуйся, пресвитером Кронштадтским нареченный.
Радуйся, Всероссийским пастырем почитаемый.
Радуйся, Иоанне, Церкви Российския пастырю предивный.

Кондак 4

Бурю внутрь имеша помышлений сумнительных братия — сопастырие, видя дерзновенный образ пастырского служения твоего, отче Иоанне. Ты же, упование на Бога возложив, с чистым сердцем воспевал Ему: Аллилуиа.

Икос 4

Слышав о тебе, Иоанне блаженне, яко ты еси пастырь добрый, страждущих и обремененных утешитель и молитвенник слезный, от всех конец земли потекоша к тебе людие Божии. Мы же, ведая   человеколюбие и милосердие твое, благодарне зовем таковая:

Радуйся, любовь к Богу и людям преизобильная.
Радуйся, надеждо в бедах сущих несумненная.
Радуйся, о падших пред Богом заступниче.
Радуйся, дерзновенный о людех молитвенниче.
Радуйся, яко сирых и вдовиц защищал еси.
Радуйся, яко во узах пребывающих утешал еси.
Радуйся, недужных телом и душею врачевателю.
Радуйся, смятенных сердец умирителю.
Радуйся, Иоанне, Церкви Российския пастырю предивный.

Кондак 5

Яко боготечная пресветлая звезда просиял еси в Церкви Православней, чудотворче предивне Иоанне, образ являя пастыря и молитвенника усерднаго за народ и страну нашу. Радуясь сему, людие православныя немолчно воспевают Богу: Аллилуиа.

Икос 5

Видя множество людей российских, утешения чающих, Иоанне милосердне, ты обходил грады и веси Отечества нашего и яко апостол просвещал народ светом веры Христовой. Мы же, велия труды твоя почитающе, благодарне возносим похвалы сия:

Радуйся, Державу Российскую крепко возлюбивый.
Радуйся, непрестанно молитву о благе ея возносивый.
Радуйся, Севера Русского защита и ограждение.
Радуйся, края Поморского надеждо и укрепление.
Радуйся, Архангельския земли чудное украшение.
Радуйся, веси Сурския велие прославление.
Радуйся, Земли Русския пресветлое озарение.
Радуйся, Православной веры в ней утверждение.
Радуйся, Иоанне, Церкви Российския  пастырю предивный.

Кондак 6

Проповедницы чудных деяний твоих явишася множество людей, ведущих силу молитвы твоея, пастырю Христов Иоанне. Слышав сие, не токмо православныя, но и иновернии уповали на помощь твою. По молитвам же твоим просимое получая, воспеваша Богу: Аллилуиа.

Икос 6

Возсиял еси житием твоим в Церкви Православной паче сияния северного, Иоанне благосердне. Радуясь сему, молим Господа сил, дабы нам подражать житию твоему, со умилением взывая сице:

Радуйся, многосветлый Церкви светильниче.
Радуйся, жизни во Христе проповедниче.
Радуйся, людских скорбей утешителю.
Радуйся, милостыни щедрый подателю.
Радуйся, яко душам заблудшим помогал еси.
Радуйся, яко любовь свою на всех простирал еси.
Радуйся, спасения нашего наставниче.
Радуйся, любве неиссякаемый источниче.
Радуйся, Иоанне, Церкви Российския пастырю предивный.

Кондак 7

Хотя Всеблагий Господь спасти народ наш от испытаний и бед, грядущих на него  по праведному суду Божию, исполни тя, отче Иоанне, духа пророчества и премудрости, да словом твоим вразумленный, непрестанно поет Богу: Аллилуиа.

Икос 7

Нового избранника Божия тя ведуще, Иоанне преславне, каждодневно Жертву Бескровную о всех и за вся приносяща, боголюбивии людие с верою и надеждою к тебе притекаху, с любовию воспеваше тебе таковая:

Радуйся, образ великого пастыря миру явивый.
Радуйся, народу Божию неустанно служивый.
Радуйся, Царя Небеснаго рабе верный.
Радуйся, служителю Того усердный.
Радуйся, яко народному горю сострадал еси.
Радуйся, яко спасения ищущим помогал еси.
Радуйся, обуреваемых страстьми тихое пристанище.
Радуйся,  бедных и странников надежное прибежище.
Радуйся, Иоанне, Церкви Российския пастырю предивный.

Кондак 8

Странное и дивное чудо явлено бысть тебе, пастырю Всероссийский  Иоанне. Милейшая чада Отца Небесного нарекла еси в видении Пречистая Матерь Божия тя и вся люди, последующия тебе. Мы же, ведая о сем,  славим Бога, поя Ему: Аллилуиа.

Икос 8

Весь преисполнен любве к людем, Кровию Сына Божия искупленным, Иоанне достохвальне, ты пошел еси к неимущим благочестия, трезвения и страха Божия. Сих же кротостию и любовию покорив Христу, научи и нас усердно взывати тебе сице:

Радуйся, благочестия ревностный насадителю.
Радуйся, сирых и убогих милостивый покровителю.
Радуйся, мудрый делателю винограда Христова.
Радуйся, лучу пресветлый любве Божия.
Радуйся, яко окамененныя сердца пробуждал еси.
Радуйся, яко в пьянстве пребывающих вразумлял еси.
Радуйся,  супружеской неверности обличителю.
Радуйся, о покаянии грешников рачителю.
Радуйся, Иоанне, Церкви Российския  пастырю предивный.

Кондак 9

Всем, спасения чающим, воздвиже тя Господь на радость, богоносне отче  Иоанне. Людие же российстии во множестве к тебе притекаху и яко другу Христову исповедаху грехи своя. Прощение же от Бога получивше, выну взываху Ему: Аллилуиа.

Икос 9

Витии велегласныя не возмогут воспети по достоянию пастырского подвига твоего, Иоанне приснопамятне: в браке быв,  яко безбрачен был еси, Святых Тайн Христовых на всяк день причащался еси и всем был вся, да всяческая Христу приобрящеши. Мы же, ведуще сие, воспеваем тебе таковая:

Радуйся, Хлебом Жизни насыщенный.
Радуйся, Питием Бессмертным напоенный.
Радуйся, путь девства и чистоты избравый.
Радуйся, многия скорби претерпевый.
Радуйся, яко милосердие Божие проповедал еси.
Радуйся, яко сораспятися Христу возжелал еси.
Радуйся, проповедниче дерзновенный.
Радуйся, наставниче пастырей богомудрый.
Радуйся, Иоанне, Церкви Российския пастырю предивный.

Кондак 10

Спасти хотя немощныя в вере от ересей и раскола, обличал еси козни врагов веры Православныя, пастырю доблестный  Иоанне. Душу же свою за спасение народа Божия положив, Царствия Небесного достигл еси, идеже с лики святых непрестанно Бога славиши и поеши Ему: Аллилуиа.

Икос 10

Стена крепка был еси страждущим людем, от всех конец Отечества нашего к тебе приходящим, Иоанне праведный. Буди же ограждение неодолимое от бед и напастей всем, взывающим ти сице:

Радуйся, душевредных расколов искоренителю.
Радуйся, с силами ада доблестный воителю.
Радуйся, в брани духовной нам укрепление.
Радуйся, от козней вражиих ограждение.
Радуйся, яко неведующия Бога просвещал еси.
Радуйся, яко о спасении людей радел еси.
Радуйся, воине Христов добропобедный.
Радуйся, молитвенниче о нас преизрядный.
Радуйся, Иоанне, Церкви Российския пастырю предивный.

Кондак 11

Пение всеумиленное приими от нас, дивный угодниче Божий Иоанне. И пребывая ныне на небеси, вознеси молитвы твоя Царю всех веков, дабы в Отечестве нашем из рода в род присно воспевалась победная песнь: Аллилуиа.

Икос 11

Светозарную свещу, путь спасения заблудшим указующую, ведаем тя, Иоанне преблаженне. Воззри на нас, чад твоих, облегчи наша скорби и наша недуги исцели, да благодарно тебе вопием:

Радуйся, светом благодати Божией преосененный
Радуйся, столпе Православия непоколебимый.
Радуйся, скорбей и печалей отгнание.
Радуйся, плачущих скорое утешение.
Радуйся, яко тяжкия болезни врачевал еси.
Радуйся, яко немощи наша исцелял еси.
Радуйся, кающихся неложное упование.
Радуйся, спасающихся непрестанное радование.
Радуйся, Иоанне, Церкви Российския пастырю предивный.

Кондак 12

Благодать, данную тебе от Бога ведуще, целителю и чудотворче Иоанне, молим тя прилежно: изобильных даров Духа Святаго да и мы причастницы будем и  во умилении сердец наших благодарно воспоем Богу: Аллилуиа.

Икос 12

Поюще твое достохвальное житие на земли и славу, юже стяжал еси на небеси, ублажаем тя, святый праведный отче наш Иоанне, множество храмов и обителей православных основателя, и от умиленных сердец  возглашаем ти  сицевая:

Радуйся, храмов Божиих усердный строителю.
Радуйся, обителей иноческих устроителю.
Радуйся, ангельского жития в них ревнителю.
Радуйся,  изнемогающих в подвигах утешителю.
Радуйся, яко ревнующим о спасении помогал еси.
Радуйся, яко к молитве и терпению призывал еси.
Радуйся, до конца Господу послуживый.
Радуйся, Царствие Божие наследовавый.
Радуйся, Иоанне, Церкви Российския пастырю предивный.

Кондак 13

О святый праведный отче Иоанне, страны Российския чудное и светлое похвало, пресвитере Кронштадтский, пастырю Всероссийский, всемирный светильниче и великий угодниче Христов.   Приими от нас, недостойных, малое сие молебное пение и благоприятными твоими к Богу молитвами  избави от бед и скорбей, да сподобимся с тобою в Царствии Небеснем вечно воспевати Богу: Аллилуиа.

Сей кондак читается три раза, затем икос 1  и кондак 1 

Икос 1

Ангела-хранителя твоего в светлости неизреченной, отроча младо быв, яве узрел еси, досточудне отче Иоанне. И тако  избранника Божия тя ведуще, сице глаголем:

Радуйся, родителей благочестивых утешение.
Радуйся, ангела-хранителя увеселение.
Радуйся, молитве в доме отчем навыкнувый.
Радуйся, послушание с детства возлюбивый.
Радуйся, яко в бедности учение проходил еси.
Радуйся, яко и тогда попечение о сродниках имел еси.
Радуйся, всем сердцем Бога возлюбивый.
Радуйся, праведным житием Ему угодивый.
Радуйся, Иоанне, Церкви Российския пастырю предивный.

Кондак 1 , глас 8

Избранному во иереях, пастырю великому, молитвеннику неусыпному, земли Русския светильнику неугасимому, пресвитеру Божию Иоанну радостно взываем:

Радуйся, Иоанне, Церкви Российския пастырю предивный.

 Молитва

О великий угодниче Христов, святый праведный отче Иоанне Кронштадтский!

От дней юности возлюбил ты Христа Бога и имел желание велие в дальних странах проповедывать веру православную. Но человеколюбивый Господь призвал тебя к многотрудному подвигу служения в Отечестве нашем в граде Кронштадте. Помоги и нам с непоколебимой верой все принимать от руки Божией.

В ежедневном причащении Святых Христовых Таин ты имел источник неиссякаемый благодати Духа Святаго. Помолись о нас, немощных, дабы и нам  неосужденно и в жизнь вечную чаще припадать к Источнику сему.

Имея глубокую любовь и сострадание к народу Божию, ты шел к заблудшим, бедным и отчаявшимся. Научи и нас любви деятельной и состраданию к нуждающимся в помощи и милосердии.

Радея об исправлении жизни людей оступившихся, ты создал дома трудолюбия — источник достатка и радости. Укажи и нам пути служения спасительного для народа нашего.

Будучи усердным храмоздателем,  ты помогал в строительстве и благоустроении множества храмов и обителей на Земле Русской.

Молим тя, открой сердца и души благотворителей, в Отечестве нашем пребывающих, для строительства церковного.

Дивным своим пастырским служением ты  вознес служение оное на высоту недосягаемую и явил миру образ пастыря предивного — чудотворца, неустанного труженика, великого молитвенника и печальника перед Богом за народ и страну нашу — и  стал воистину Пастырем Всероссийским.

Помолись, отче праведный, дабы не оскудела Земля Русская подвижниками и молитвенниками, достойными и мудрыми делателями на ниве Христовой, ревностными служителями у Престола Божия, имеющими тебя во образ и подражание.

Просим тя усердно, Пастырю Христов Иоанне, непрестанно молись о Церкви, Отечестве и народе нашем, дабы укреплялась в нас вера православная, не иссякала любовь в сердцах наших и не угасала надежда на неизреченное человеколюбие Божие.

Предстоя ныне Престолу Господа сил, испроси нам, отче Иоанне, помощи в достойном прохождении поприща бытия земнаго, дабы сподобиться неизреченной радости Царствия Небесного, где немолчно славится Имя Пресвятыя Троицы — Отца, и Сына, и Святаго Духа ныне и присно, и во веки веков. Аминь.

Краткое житие

Прав. Иоанн Кронштадтский

Великий молитвенник — праведный Иоанн Кронштадтский… К нему молитвенно обращались еще при земной жизни. Во время литургии к отцу Иоанну в алтарь несли целые кипы телеграмм, писем с просьбой помолиться об исцелении, устроении житейских или духовных дел. Не прервалось молитвенное общение Кронштадтского пастыря и его многочисленных духовных чад по сей день. Первые акафисты, адресованные святому, стали появляться задолго до его официальной канонизации. 

Великий молитвенник, подвижник, может быть, самый известный из священников Русской Церкви начала XX в. родился на Русском Севере, в небольшой деревне Сура. Сын бедного церковного клирика, Иван Сергиев, благодаря помощи родителей, смог окончить духовное училище, а затем поступить в семинарию. 

Сам он вспоминал, что особая помощь Божия сопровождала его с детства.  

• Житие святого  повествует, что уже в детстве чистый душой отрок удостоился видеть своего Ангела Хранителя.  
• Чудесным образом освоил Иван грамоту, которая трудно ему давалась: после горячей молитвы он вдруг обнаружил, что ему стало намного легче читать, понимать прочитанное. После этого он окончил духовное училище одним из лучших. 

Ивана любили как в семинарии, так и в Духовной Академии, куда он поступил на казенный счет, как отлично окончивший семинарский курс. Кроткий, добрый, как бы не от мира сего, не склонный к развлечениям, больше любящий чтение, молитву – таков студент Сергиев. 

После Академии юноша было решил стать миссионером где-нибудь на Аляске. Но Промысл Божий направил его в самую гущу мирской жизни – в приходской храм близ Петербурга, в Кронштадте. Собор ап. Андрея Первозванного стал местом его служения на 53 года, с 1855 до дня кончины.

Кронштадт, форпост России на Балтике, тогда, к сожалению, был более известен как город, куда ссылали бродяг, мелких воров, словом, людей асоциальных. Процветало пьянство, кражи, но хуже всего – безверие отчаявшихся, опустившихся на дно жизни людей. С первых дней своего священства отец Иоанн обнаружил особые качества, или, как казалось клирикам собора и даже его родным – странности:

• раздавал свое жалованье бедным; иногда он отдавал свою последнюю одежду, обувь;
• бесплатно совершал требы для тех, кто не мог оставить пожертвования;
• чтобы оказать духовную (и материальную) помощь, посещал самые неблагополучные районы города.

Прошли годы, прежде чем люди обнаружили, что «странности» батюшки – проявление его святости. Ведь по его молитвам исцелялись болящие, получали помощь страждущие. Непрерывным потоком поехали паломники со всей страны. 

Андреевский собор был постоянно полон молящимися. Скоро оказалось, что отцу Иоанну невозможно исповедовать столь великое множество людей, поэтому он ввел открытую, общую исповедь. Она производила на современников потрясающее впечатление: люди открыто называли свои грехи, со слезами приносили горячее покаяние. А еще ему бесконечно писали, слали телеграммы, просили о молитве – и получали просимое. 

Земная жизнь о. Иоанна закончилась в декабре 1908 г. Но не закончилась его молитвенная помощь всем, призывающим его имя. 

Читайте также: День памяти Иоанна Кронштадтского

О чем молятся святому 

• о помощи в учебе; сам переживший эти скорби, прав. Иоанн очень отзывчив на такие просьбы; 
• при проблемах личной, семейной жизни; 
• об исцелении болезней: особенно поразительны случаи помощи святого при тяжелых, даже онкологических заболеваниях. 

Ныне в Иоанновском монастыре Петербурга, где под спудом почивают мощи отца Иоанна, у гроба праведника почти всегда кто-то читает акафист или канон, прося помощи и поддержки.

Будем молиться – ему и вместе с ним. 

Наталья Сазонова.